Ish-boksieri ukrainas, Vitali Klitschko ka reaguar pas fillimit të sulmeve ushtarake ruse ndaj vendit të tij.
Klitschko i cili i është bashkuar ushtrisë ukrainase në mbrojtje të vendit, i ka dhënë motivim bashkëkombësve të tij përmes një video.
“Kievi nën ligjin ushtarak – selia operacionale e kryeqytetit ka shpallur një sërë vendimesh në lidhje me agresionin”, ka shkruar Klitschko.
Më pas, ai flet edhe për veprimet që do të ndërmerren, ndërsa është shprehur i gatshëm të jap gjithçka për vendin e tij.
“Situata në Kiev është nën kontroll për momentin, por sigurisht që njerëzit janë nervozë. Ne jemi në luftë dhe luftojmë për vendin tonë, por kemi nevojë për mbështetjen e gjithë botës dhe sanksione vërtet të dhimbshme kundër Rusisë menjëherë”, thotë Klitschko.
Edhe vëllai i tij, Wladimir Klitschko, i është bashkuar ushtrisë në luftë për ta mbrojtur vendin e tij nga agresori rus.
Ish-kampionët e botës në boksin profesionist bëjnë thirrje që të mbrohet toka ukrainase, ndërsa kërkojnë edhe mbështetje nga ndërkombëtarët.
“I ftojmë të gjithë partnerët tanë ndërkombëtarë që ta vëzhgojnë dhe ta shohin këtë tragjedi që po ndodh në Ukrainë dhe këtë luftë pa kuptim dhe pa sens, e cila nuk do të ketë as fitues as humbës. Duam t’ju themi se ne duhet të qëndrojmë të bashkuar kundër këtij agresioni, kundër agresionit rus. Mos e leni të ndodh kjo në Ukrainë, të ndodhë në Evropë, dhe eventualisht edhe në botë. Së bashku jemi më të fortë, mbështeteni Ukrainën”, thonë vëllezërit Klitschko.
Discussion about this post