Prokuroria e Elbasanit ka mbyllur hetimet dhe ka dërguar për gjykim me katër akuza Koço Buzon, i cili vrau me armë zjarri bashkëshorten e tij Liljana Buzo në muajin maj të vitit 2021 dhe e goditi me thikë më pas, pasi kishin mbaruar seancën gjyqësore në Gjykatën e qytetit.
Ditën kur ka ndodhur ngjarja tragjike, ishte vendosur ballafaqimi i palëve në Gjykatë dhe dy djemtë e çiftit po shoqëronin të ëmën për në Gjykatë, ku do zhvillohej seanca e parë e çështjes pas denoncimit për ushtrim dhune për 58-vjeçarin Koço Buzo ndaj saj.
Seanca dështoi, pasi burri i akuzuar si dhunues nuk ishte paraqitur, edhe pse kishte konfirmuar praninë e tij pas marrjes së njoftimit zyrtar.
Sipas burimeve, autori i ngjarjes së rëndë, kishte ndjekur fshehurazi bashkëshorten dhe dy djemtë e tij dhe pasi ata kishin hyrë në godinën e Gjykatës së Elbasanit, ai kishte qëndruar i fshehur rreth 50 metra larg në një nga rrugët që lidh këtë institucion me Drejtorinë Vendore të Policisë.
Në momentin që viktima Liljana Buzo, e shoqëruar nga fëmijët ka dalë nga Gjykata dhe po ecnin në rrugën, ku ai ishte duke pritur, ka qëlluar menjëherë mbi gruan e vet me breshëri kallashnikovi. Por ngjarja e rëndë merr përmasat e një skene horrori, pasi ai i ka ngulur edhe thikën në grykë.
Pasi qëlloi 7 herë ndaj bashkëshortes me arme dhe me thikë, Koco Buzo ka plagosur një avokat dhe një kalimtar, që ndërhynë për të ndalur veprimet e mëtejshme të Buzos, i cili ka tentuar të largohet nga vendi i ngjarjes, por është arrestuar nga Policia.
Liljana Buzo, ishte larguar që nga fillimi i vitit 2021 nga shtëpia, për shkak të dhunës së vazhdueshme psikologjike e fizike të ushtruar nga bashkëshorti i saj, Koço Buzo, autor i krimit të rëndë.
Viti 2021 ishte një vit tragjik për gratë në gjtihë Shqipëri. Raporti i Policisë së Shtetit tregon se 12 gra u vranë në periudhën Janar – Nëntor 2021 ku 10 prej tyre janë vrarë për shkak të marrëdhënieve familjare, nga bashkëshortët apo partnerët e tyre.
Discussion about this post