Rakipi u shpall “non grata”/ Basha: Koha na dha të drejtë!

Ish kreu i Partisë Demokratike, Lulzim Basha ka reaguar sërish pas shpalljes non grata të ish deputetit Aqif Rakipi, duke thënë se koha i dha të drejtë PD për denoncimet e bëra.

Duke cituar një pjesë nga deklarata e DASH, Basha shkruan se kjo tregon se nëpërmjet krimit të organizuar Rama fitoi zgjedhjet në 2017, ndërsa shton se kriza e vendit sot vjen si pasojë e shkatërrimit të institucioneve demokratike.

“Koha na dha prapë të drejtë! Aqif Rakipi, Tom Doshi, Vangjush Dako janë bedelët me të cilët Edi Rama kreu masakrën zgjedhore dhe tjetërsoi vullnetin e shqiptarëve që kërkonin ndryshim. Në argumentimin nga Departamenti i Thesarit të Shteteve të Bashkuara për sanksionet ndaj Aqif Rakipit theksohet: “Grupe të shumta të krimit të organizuar (GKO) në Shqipëri kanë ofruar para, dhurata ose premtime për vende pune apo lëshime në këmbim të votave për partinë e tyre të preferuar politike”. Ky paragraf tregon se si i “fitoi” zgjedhjet Edi Rama në 2017 dhe në 2021. Kriza në të cilën ndodhet sot Shqipëria, është pasojë e shkatërrimit të institucioneve demokratike dhe të procesit zgjedhor, që dje u konfirmua edhe nëpërmjet sanksioneve të Departamentit të Thesarit të Shteteve të Bashkuara të Amerikës. Edhe pse këtë duhet ta kishin bërë organet ligjzbatuese shqiptare, ai është një lajm i mirë që partneri ynë strategjik SHBA është fokusuar në luftën kundër korrupsionit që po minon demokracinë dhe po shkatërron mirëqenien e shqiptarëve”, shprehet Basha.

Departamenti i Thesarit i Shteteve të Bashkuara të Amerikës njoftoi të hënën se kishte vendosur sanksione ndaj ish-deputetit të Elbasanit, Aqif Rakipi dhe pronarit të televizionit Ora News, Ylli Ndroqi.

Në njoftimin e shpërndarë nga Ambasada e Shteteve të Bashkuara në Tiranë, Rakipi përshkruhet si një ish-deputet famëkeq nga Elbasani, i cili ka ndikim të dëmshëm dhe destabilizues në proceset politike në Shqipëri. Ndërkohë, biznemeni Ylli Ndroqi, i përfshirë në fushën e medias akuzohet se ka shfrytëzuar mediat për të zhvatur dhe shantazhuar qytetarë shqiptarë.