Ish deputeti demokrat, Fatos Hoxha ka propozuar një platformë me pesë pika për zgjedhjet në PD pas dorëheqjes së Lulzim Bashës dhe mënyrën se si duhet të drejtohet kjo forcë politike në të ardhmen.
Përmes një statusi në Facebook, Hoxha shkruan se zgjedhjet për kryetar duhet të bëhen me një fushatë 90 ditore, mandati i kryetarit të jetë 2-vjeçar dhe në garë nuk duhet të hyjnë as Basha dhe as Berisha.
“PD duhet të futet në zgjedhje për Kryetarin sot, me fushatë zgjedhore së paku 90 ditore, zgjedhjet të jenë transparente, me lista zgjedhësish publike, me administrim neutral (pse jo nga KQZ, pse jo me votim elektronik); Mandati i kryetarit të jetë dy vjeçar, pa të drejtë përtëritje. Mandati dy vjeçar i papërtëritshëm të jetë i përcaktuar në Statutin e PD. Klauzola e Statutit lidhur me mandatin të jetë e pamodifikueshme për 30 vjet nga miratimi i saj (kulti i individit dhe pengmmarrja e partisë nuk luftohen dot ndryshe); Sali Berisha dhe Lulzim Basha të ndalohet të kandidojnë në zgjedhjet fillestare, si bartës dhe frymëzues të konfliktit brendapartiak, si dhe të ndalohen të marrin pjesë, të organizojnë apo të ndikojnë në mënyrë të drejtpërdrejtë apo të tërthortë në procesin zgjedhor fillestar; Grupi parlamentar i PD të unifikohet dhe t’i nënshtrohet disiplinës së grupit në përputhje me rregullat e funksionimit të tij; Drejtimi i Partisë në periudhën 90 ditore të bëhet nga autoritetet e përcaktuara nga statuti, të cilat duhet të kufizohen vetëm në menaxhimin e përditshëm të punëve dhe të mbajnë distancë dhe neutralitet ndaj procesit zgjedhor”, shkruan Hoxha në Facebook.
Discussion about this post