Përvec se po kundërshtohet nga qytetarët, rritja e çmimit të energjisë ka ngritur dyshimet edhe nga ekspertët e kësaj fushe. Eduard Elezi, ish-drejtori në Entin Rregullator të Energjisë Elektrike thotë gjithçka ka ndodhur për shkak të të keqmenaxhimit dhe fakti që kur kishim kapacitete energjia shitej me çmim shumë të ulët.
“Ky vit ishte viti kampion për prodhimin e energjisë elektrike. Realisht kështu është, është prodhuar 7 terawatt energji elektrike. Këtu në Shqipëri është shitur gati 1.3 ose 1.4 terawatt dhe me çfarë çmimesh janë shitur? Me çfarë çmimesh e shiti KESH-i para një muaji energjinë elektrike?”, tha ai.
Ndër të tjera ai shprehet se, qeveria duhet të ndërhyjë duke i dhënë kredi në formën e borxhit kompanive të sistemit të energjisë elektrike.
“Pjesa e mundësisë së ndërhyrjes shtetërore duke parë një planifikim nga buxheti i shtetit të zërave të cilët nuk janë shumë të domosdoshëm, mund të hiqte fonde nga këto zëra dhe t’ia kalonte kompanive në formë huaje ose në formë të ndryshme”, u shpreh ai.
Nga ana tjetër, qytetarët thonë se kanë filluar të ndjejnë që tani barrën e rëndë të çmimeve të kripura, madje shtojnë se pamundësia ekonomike për përballimin e tyre ka sjellë edhe konflikte familjare dhe dhunë.
