Komiteti i Investimeve Strategjike ka miratuar dhënien e statusit “Investim/Investitor Strategjik – Procedurë e Veçantë” për projektin “TEDA Prrenjas”, të propozuar nga kompania kanadeze “CVMR Albania” sh.p.k.
Projekti në fjalë është në sektorët e industrisë duke parashikuar një vlerë totale investimi prej 205 milionë dollar.
Por çfarë përfaqëson në fakt projekti i strategjikëve “CVMR Albania” sh.p.k sipas të dhënave të raportuara në vendimet që ka marrë Komiteti?
Ky projekt parashikon ndërtimin e një rafinerie për përpunimin e nikelit dhe një fabrike tullash në Bashkinë Prrenjas, me një sipërfaqe zhvillimi prej 5 hektarësh.
Rafineria për përpunimin e nikelit në Shqipëri do të sigurojë një kapacitet të prodhimit të hekur-nikelit të papërpunuar deri në 10,000 ton të shfrytëzueshëm në vit.
Kompania ka blerë një pronë prej 50 hektarësh të përcaktuar si Zonë e Lirë Industriale, për të ndërtuar fazën e parë të dy rafinerive të nikelit dhe hekurit të klasit botëror në formë modulare, bazuar në metalurgjinë e avullit të patentuar të CVMR , me aftësinë për ta zgjeruar fazën e parë të operimit trefish.
Faza e parë do të prodhojë 10,000 ton në vit pluhura nikeli dhe hekuri me pastërti të lartë dhe nano pluhura.
Pjesë e rafinerisë do jenë linjat e përpunimit paraprak dhe ndarjes mekanike me magnet.
Gjithashtu synohet edhe ndërtimi i një fabrikë tullash të plota me kapacitet 300 milion tulla në vit, e cila do të përdorë si lëndë të parë mbetjet nga përpunimi fillestar i hekur nikelit bruto.
Vlera e investimit të projektit të investimit “TEDA Prrenjas” parashikohet të jetë 205 milionë Euro dhe pritet të punësojë 600 punonjës.
Projekti do të zbatohet nga kompania kanadeze CVMR e cila planifikon të vendosë në funksionim impiantet dhe të fillojë prodhimin në fund të vitit 2026.
Takimet me Ramën dhe Ballukun:
Vetë Korporata CVMR ka njoftuar se me 4 prill 2025, dega e saj CVMR (Shqipëri) mori një licencë nga Agjencia Shqiptare e Zhvillimit të Investimeve (AIDA) për të ngritur rafinerinë e parë të nikelit në Shqipëri.
Sipas CVMR ky moment erdhi pas takimit me Kryeministrin Rama, zëvendëskryeministren Balluku, dhe Kryetarin e Bashkisë së Prrenjasit.
Sipas tyre fabrikat CVMR në Shqipëri do të prodhojnë produkte nikeli dhe hekuri, të tilla si pluhura nikeli, nanoplura, forma komplekse rrjetash për përdorim në industrinë e mbrojtjes dhe hapësirës ajrore, superlidhje, pluhura nikeli dhe hekuri të përdorura posaçërisht në printimin 3D dhe prodhimin e pjesëve të makinave, pjesëve të kompjuterëve, pjesëve elektronike, kallëpeve dhe veglave, komponentëve të baterive të automjeteve elektrike dhe instrumenteve mjekësore.
Ish-Këshilltari i qeverisë kthehet në investitor strategjik:
Aksioneri dhe administratori i “CVMR Albania“, Theodor Laci kryeson Bursën Shqiptare të Metaleve.
Laci ka mbi 30 vjet përvojë udhëheqëse në sektorët e Infrastrukturës, Kujdesit Shëndetësor, Mjedisit dhe Burimeve Natyrore në Ballkanin Perëndimor.
Nga viti 2010 deri në vitin 2018, ai shërbeu si Këshilltar i Lartë brenda Qeverisë Shqiptare, duke punuar si me Ministrin e Shëndetësisë ashtu edhe me Ministrin e Financave.
Sekuestrimi “CVMR Albania” nga përmbaruesit:
Në dokumetat e siguruara nga VoxNews, me datë 18.08.2025, me anë të urdhrit Nr.630 Prot., leshuar nga Zyra e Permbarimit Privat “TIRANA BAILIFF S” SHPK, u urdhërua: “Vendosja e mases se sekuestros konservative ne aktivet/kuotat qe zoteron pala debitore, shoqeria CVMR Albania SHPK, me NUIS (NIPT) – M42224017C.
Ky projekt do t’i mundësojë Shqipërisë të shmangë varësinë nga tregjet e lëndëve të para të nikelit dhe hekurit dhe luhatjet ciklike të çmimeve të tyre.
Sipas vendimit, projekti ndahet në dy faza, përkatësisht atë të ndërtimit të infrastrukturës ndërtimore e më pas implementimin e moduleve dhe lidhjen me infrastrukturën ekzistuese.
Statusi “Investim/Investitor Strategjik Procedurë e Veçantë” i jepet projektit të investimit “TEDA Prrenjas” për një periudhë 3- vjeçare.
/Vox News/
Discussion about this post