Ish-kryebashkiaku i Lushnjës, Fatos Tushe përfundon sërish në dyert e SPAK. Ai është paraqitur mëngjesin e sotëm në ambientet e Strukturës së Posaçme Kundër Krimit dhe Korrupsionit.
Burime pranë SPAK thanë se ndaj Tushes ka nisur një hetim pasuror. Pas daljes nga ambientet e Prokurorisë së Posaçme, ish-kryebashkiaku deklaroi për gazetarët se paraqitja në SPAK lidhej me mos deklarimin e një pasurie.
Ai përfundoi dënimin me burg pak kohë më parë.
Në vitin 2022, Fatos Tushe u cilësua fajtor nga Gjykata e Posaçme për shpërdorim detyre në dy raste. Ai u dënua me 3 vite 8 muaj burgim, që për shkak të gjykimit të shkurtuar u konvertuan në 2 vjet e katër muaj. Tushes po ashtu iu hoq drejta për të ushtruar funksione publike për 5 vite. Gjykata tha se Tushe shpërdoroi detyrën për shkak se lejoi një ndërtim pa leje, ndërsa abuzoi me karburantin e bashkisë.
Gjykata dënoi po ashtu ish-nënkryetarin Gentian Nushi si dhe 17 persona të tjerë, zyrtarë të bashkisë e biznesmenë, të përfshirë në abuzimet me një tender për kanalet vaditëse.
Pas arrestimit me urdhër të SPAK në korrik 2021, Tushe u shkarkua nga detyra me vendim qeverie.
Discussion about this post