Ish-kryeministri italian dhe lideri i partisë Italia Viva, Matteo Renzi, vizitoi sot kampin e Gjadrit në Shqipëri, ku kritikoi ashpër qeverinë e kryeministres Giorgia Meloni për menaxhimin e fondeve publike. Renzi akuzoi qeverinë se ka shpërdoruar gati 1 miliardë euro në ndërtimin e qendrave për emigrantët në Shqipëri, të cilat aktualisht janë bosh.
Gjatë vizitës, Renzi propozoi që këto qendra të shndërrohen në burgje për shtetasit shqiptarë të dënuar në Itali, duke argumentuar se kjo do t’u mundësonte atyre të ishin më afër familjeve të tyre dhe do të lehtësonte mbipopullimin e burgjeve italiane. Ai theksoi se ky propozim do të ishte një zgjidhje më e dobishme sesa mbajtja e qendrave bosh, duke e quajtur projektin aktual një dështim dhe shpërdorim të burimeve publike.
“Me anë të një marrëveshje me shtetin shqiptar, qendrat e Gjadrit dhe Shëngjin të kthehet në burg për shqiptarët të cilët vuajnë dënimin në Itali. Jemi këtu për të dhënë një mesazh të qartë. Këtë ide e kemi artikuluat edhe në Parlamentin italian. Unë shikoj çështjet e buxhetit, këtu shteti Italian humbi gati 1 miliardë euro nga buxheti i italianëve. Me kaq para në Itali mund të bënim qindra qendra të tilla. Përveç miqësisë Meloni-Rama, cila është arsyeja që u ndërtuan këto qendra?”, tha ish-kryeministri italian.
Kampi i Gjadrit, së bashku me atë të Shëngjinit, u ndërtuan në kuadër të një marrëveshjeje mes qeverive të Italisë dhe Shqipërisë për të pritur emigrantët e ndaluar në det nga autoritetet italiane. Megjithatë, këto qendra kanë mbetur bosh për shkak të vendimeve gjyqësore në Itali që kanë penguar transferimin e emigrantëve në Shqipëri. Kjo ka sjellë kritika të forta nga opozita italiane, e cila e konsideron marrëveshjen një dështim dhe shpërdorim të fondeve publike.
Renzi gjithashtu paralajmëroi se ky projekt mund të dëmtojë procesin e integrimit të Shqipërisë në Bashkimin Europian, duke e larguar vendin nga standardet dhe vlerat europiane. Ai theksoi se Shqipëria ka potencial për t’u bërë pjesë e BE-së, por projekte të tilla mund të pengojnë këtë rrugëtim.
Kritikat e Renzit pasojnë ato të liderëve të tjerë të opozitës italiane, të cilët kanë kundërshtuar marrëveshjen mes Italisë dhe Shqipërisë për menaxhimin e emigrantëve, duke e cilësuar atë si një shkelje të ligjeve ndërkombëtare dhe një dështim të politikave qeveritare.
Discussion about this post