Deputeti demokrat, Tritan Shehu ka reaguar pas vendimit të mazhorancës për t’u tërhequr nga zhvillimi i komisioneve online, duke e cilësuar këtë një “tërheqje të imponuar nga rezistenca”.
Shehu shkruan në Facebook, se kjo është një tërheqje e maxhorancës nga një tentativë për grusht shteti, teksa e cilëson si një përpjekje për t’i mbyllur gojën opozitës.
“Tërheqja nga “Komisionet on line”, tërheqje e imponuar nga rezistenca!
Në fakt kjo është një tërheqje e maxhorancës nga një tentativë për “grusht shteti” në Kuvend!
Është një rivendosje për këtë çështje e të drejtës ligjore e kushtetuese jo vetëm e opozitës, por dhe e të gjithë deputetëve të Kuvendit që u tentua tu “mbyllej” goja, e medias në tërësi që u tentua të lihej në terr, e opinionit publik që iu mohua e drejta për tu informuar e ndjekur debatet e atyre për të cilët ka votuar.
Sipas deputetit, “kjo është një ‘prapaktheu’ e Ramës&Co e atij skenari që synon thellimin e autokracisë, dhe se është thjesht një tërheqje momentale e imponuar nga rezistenca e opozitës.
“Kjo është një “prapaktheu” e Ramës&Co nga një element i atij skenari, që synon thellimin e autokracisë, deformimin e demokracisë, implementimin e modeleve të autokrateve lindore.
Nuk është një “kthesë” e gjerë dhe e bazuar në mirëkuptimin, dëshirën e Rilindjes për të korrigjuar gabimet e saj e as një shenjë vetëpërmirësimi e ndergjegjësimi.
Është thjesht një tërheqje momentale e imponuar nga rezistenca, nga paralajmërimi e veprimi për të mos njohur e marrë pjesë në të tilla “mbledhje” pa vlerë e në kundërshtim me Kushtetutën, rregulloren, edhe jo në përputhje as me masat e përgjithshme epidemiologjike në vend, shkruan Shehu”.
Reagimi i Shehut vjen pasi kreu i grupit parlamentar të PS, Taulant Balla deklaroi më herët se nisur nga java tjetër, mbledhjet e Komisioneve Parlamentare do të zhvillohen online, duke i dhënë fund përplasjeve me opozitën.
