Ish-ministri i Drejtësisë Ylli Manjani, ka reaguar në lidhje me marrjen të pandehur nga SPAK të ish-zv.kryeministrit Arben Ahmetaj për atë që njihet si dosja “Buka”, privatizmi i ish-fabrikës së Bukës, ku tashmë ndodhet kompleksi ‘Emerald’ tek rruga “5 Maji” në Tiranë, në zonën e “Medresesë”.
Në një postim në rrjetet sociale, Manjani shkruan se pse është marrë i pandehur vetëm Arben Ahmetaj dhe jo Erion Veliaj nga SPAK, pasi ai ka dhënë lejen për ndërtimin në atë truall.
Sipas tij, dhënia e lejes së ndërtimit në një truall, pronari i të cilit e kishte humbur titullin 1 vit para dhënies së lejes, është shkelje e hapur e ligjit dhe e interesit publik.
Postimi i Manjanit
“Ore kot, për muhabet dmth, mirë Arben Ahmetaj paska shpërdoruar detyrën te rasti “Buka” në Tiranë, po Erion Veliaj që ka dhënë leje ndërtimi tek ajo tokë, kur gjykata e kishte hequr pronësinë mbi tokën kërkuesit të lejes ka faj?!
D.m.th. nuk merret vesh se si e ka shpërdoruar detyrën duke mbrojtur interesin publik, por hajt më të themi se këtë e gjykon SPAK. Por dhënia e lejes së ndërtimit në një truall, pronari i të cilit e kishte humbur titullin 1 vit para dhënies së lejes, është shkelje e hapur e ligjit dhe e interesit publik.
Erioni duhet të ishte nën hetim për këtë leje.
Apo s’e ka radhën tani Erioni, harrova. Janë edhe 2 “armiq” të tjerë të brendshëm në radhë para Tij… Ka rradhë puna!
Plus ndonjë që futet pa radhë…
Reformat kanë kosto…”
Kujtojmë se lidhur me këtë çështje vijon hetimi për 7 persona të tjerë, përfaqësues të Ministrisë së Financave dhe ndaj biznesmenit Lirim Fezollari. Ky i fundit përfitoi aksionet e “Buka” sh.a., bazuar në një procedurë ankandi të zhvilluar nga ish-ministri Arben Ahmetaj në vitin 2015 dhe që u konstatua e paligjshme nga gjykata.
Lirim Fezollari po hetohet për veprat penale të pastrimit të parave dhe deklarim i rremë para oficerit të policisë gjyqesore. Hetimi ndaj Fezollarit është ende i hapur, në pritje të leter-porosive nga disa vende europiane, konfirmuan burime pranë akuzës.
Discussion about this post