Ish-ministri socialist Arben Malaj ka bërë publike vendimin për të kandiduar si i pavarur për drejtimin e Bashkisë së Vlorës në zgjedhjet lokale të vitit 2027.
Përmes një deklarate publike, ai thekson se synon të ofrojë një alternativë jashtë ndikimit të partive politike dhe grupeve të interesit.
Malaj shprehet se kandidimi i tij do të mbështetet mbi parimet e pavarësisë, transparencës dhe llogaridhënies ndaj qytetarëve. Sipas tij, nuk do të ketë detyrime ndaj “padronëve”, oligarkëve apo emrave të korruptuar dhe çdo vendim do të merret vetëm në interes të banorëve të Vlorës.
Në mesazhin e tij, ish-ministri premton se do të fokusohet te zgjidhja e problemeve konkrete të qytetit, si prona, turizmi, infrastruktura dhe shërbimet publike. Ai shton se administrata vendore duhet të funksionojë mbi bazën e meritokracisë dhe jo të presioneve politike.
Malaj deklaron se synon të ndërtojë një lëvizje qytetare që bashkon intelektualë, aktivistë, sipërmarrës dhe qytetarë të zhgënjyer nga politika tradicionale. Sipas tij, Vlora ka nevojë për një model të ri qeverisjeje, të bazuar te barazia e mundësive dhe transparenca.
Me këtë shpallje, Arben Malaj hyn zyrtarisht në garën për zgjedhjet vendore të vitit 2027, duke e paraqitur kandidaturën e tij si një alternativë të pavarur për drejtimin e Bashkisë së Vlorës.
Discussion about this post