Ish-ministrja Anila Denaj paraqitet në SPAK

Anila Denaj, ish-ministre e Financave, është paraqitur në SPAK mëngjesin e sotëm.

Deputetja socialiste, mësohet se është thirrur, me cilësinë e personit që mund të ketë dijeni, lidhur me hetimin që SPAK po kryhen për koncensionin e sterilizimit.

Më parë lidhur me këtë koncension është marrë në pyetje edhe ish-ministri i Shëndetësisë, Ilir Beqaj.

SPAK po heton mbi mënyrën se si kompania koncesionare Sani Service shpk, ka marrë koncesionin me vlerë 100 mln euro për 10 vite, por edhe mbi fryrjen e faturës financiare nga 12 në 17 mln euro nga viti i parë për vitet e mëpasshme.

Koncensioni i sterilizimit u padit në SPAK jo vetëm nga opozita, por edhe nga mjekë të angazhuar si pjesë e shoqërisë civile.

Denaj zëvendësoi Arben Ahmetajn në postin e ministrit të Financave. Ajo ka mbajtur postin e ministres së Financave deri në shtator 2021, kohë kur u zëvendësua nga ministrja aktuale Financave Delina Ibrahimaj.

Më herët, ka drejtuar Fondin e Sigurimit të Detyrueshëm të Kujdesit Shëndetësor, si dhe ka qenë anëtare e bordit të AKEP. Po ashtu, Anila Denaj ka mbajtur pozicionin e zv/ drejtoreshës në një bankë tregtare për periudhën 2007-2013. Nga viti 2013 deri në vitin 2015 ka mbajtur pozicion drejtues në Ministrinë e Financave.

Koncesioni i sterilizimit kaloi në duart e prokurorëve të SPAK në korrik 2022, të cilët nisëm hetimin për të zbardhur procedurat e dhënies me koncesion të këtij shërbimi.

Ajo është një prej katër projekteve të PPP nne mbështetje buxhetore në shëndetësi që e ka zanafillën në mandatin e parë qeverisës të kryeministrit Edi Rama. Kontrata u firmos në vitin 2015 mes ish-ministrit të Shëndetësisë, Ilir Beqja dhe kompanisë koncesionare SaniService –aksionerët e së cilës janë Investital LLC dhe kompanitë italiane “Servizi Italia”, “Tecnosanimed” dhe “U.Jet S.r.l”.

Paketën më të madhe të aksioneve në këtë koncesion e zotëron Investital LLC- një kompani e vogël e themeluar me kapital 1 mijë euro në Kosovë nga Ilir Rrapaj. Sipas të dhënave të publikuar nga BIRN pak kohë më parë rezulton se Rrapaj u kthye në Shqipëri pas zgjedhjeve të vitit 2013 dhe para se të fitonte koncesionin, vendosi kontakte të shpeshta me ish-ministrin e Shëndetësisë, Ilir Beqaj.

Elektrobisturia është pjesë e njërit prej seteve kirurgjikale, që kompania koncesionare “SaniService” i shet Ministrisë së Shëndetësisë për çmime që variojnë nga 16 mijë lekë deri në 45 mijë lekë (me TVSH) për çdo ndërhyrje.

Kontrata e Partneritetit Publik Privat për sterilizimin e instrumenteve kirurgjikale është në vitin e shtatë të operimit, dhe ka shënuar rritje të ndjeshme të kostove të parashikuara.

Anëtarët e komisionit që përgatiti studimin e fizibilitetit për koncesionin e sterilizimit i thanë Prokurorisë se qendra nuk ishte vënë në punë prej tetë vitesh për shkak të mungesës së stafit të trajnuar. Ata e përdorën atë si një argument më shumë se pse shërbimi duhej dhënë me koncesion.