Lufta mes kreut të PD-së Lulzim Bashës dhe ish-liderit, Sali Berishës vijon të mbajë të përçarë demokratët, që tashmë duket se janë ndarë në dy kampe.
Ish-nënkryetari i FRPD, Lisandër Hoxha, ka dalë hapur në mbështetje të Berishës dhe ka akuzuar sot Bashës se po i vë në tavolinë kryeministrit Edi Rama mandatin e dhënë nga demokratët.
Pas betejës së nisur nga Berisha, Hoxha thotë se Basha do të shkarkohet nga posti i kreut të PD dhe se pas kësaj do të krijojë partinë “Republika e Re”.
Sipas këtij të fundit, e vetmja rrugë shpëtimi për Bashën, do të jetë bashkëqeverisja me Ramën.
“Pengu Basha paska në plan të krijojë partinë Republika e Re, pas shkarkimit! E vetmja rrugë shpëtimi për të mbetet bashkëqeverisja, përmes së cilës mendon se do ushqejë egon e oportunistëve me disa poste. Për herë të dytë i vendos Ramës në tavolinë mandatin e dhënë nga demokratet. Shpërdorimi i mundit të opozitarëve për 8 vite nuk do të ketë kurrë sukses. Fundi i Pengut Bashë do të jetë turpi!”, shkruan Lisandër Hoxha.
Pas përjashtimit nga Grupi Parlamentar i PD-së, Berisha ka nisur një tur takimesh me demokratët në të gjithë vendin, për të bindur demokratët se SHBA dhe Lulzim Basha e kanë gabim dhe është përjashtuar nga grupi i PD e shpallur ‘non grata’ nga DASH padrejtësisht.
Pavarësisht, këmbënguljes së liderit historik Basha ka bërë të qartë se nuk do të ketë mbledhje të Kuvendit.
