Ish-prokurori i Krimeve të Rënda, Eugen Beci, duke komentuar operacionin e policisë në kampin e MEK në Manzë, tha se informacioni erdhi nga Irani dhe nga një agjensi turke.
Beci tha në emisionin “Të Paekspozuarit” se si prokuror ka hetuar vite më parë MEK, por mbi bazën e informacioneve të agjensive ligjzbatuese të vendeve më të rëndësishme partnere, vendeve të BE dhe ato përtej oqeanit.
Ish-prokurori tha se bazuar në këto informacione janë parandaluar edhe akte terroriste, ndërsa u shpreh se ky operacion i fundit në kampin e MEK ka të bëjë me ndryshimin e qasjes ndaj muxhahedinëve.
“Nuk ka ndodhur më parë që të veprohet me informacione nga agjensi turke ose Irani. Ne duhet të flasim qartë: Iranin ose e kemi vend jo mik, ose i marrim informacionet dhe veprojmë. Këtu ne duhet ta ndajmë, sepse ky operacioni i fundit, bazuar në vendimin e Gjykatës, është bërë bazuar në informacione që vijnë nga Irani dhe një agjensi turke që ka shkruar”, tha Beci.
Ish-prokurori tha se MEK nuk ka ndryshuar qëndrim, ajo që ka ndryshuar është qasja ndaj tyre, kjo është ajo që ka ndodhur.
Discussion about this post