Ish-zv.drejtori i AKSHI-t, Daniel Shima, u zhduk për mbi 10 orë, duke ndezur dyshime të forta rreth fatit të tij. Para zhdukjes, ai u filmua nga kamerat e sigurisë në Qytetin Studenti dhe në dalje të tunelit Tiranë-Elbasan, ndërsa mesazhi i fundit për partneren, “Po më arrestojnë”, ngriti alarmin, teksa denoncimin për zhdukjen e Shimës e bëri nëna e tij.
E çuditshme është se në këto 10 orë, edhe pse lajmi për zhdukjen e tij kishte mbushur portalet dhe televizionet, nuk pati asnjë reagim nga Shima, duke ngritur dyshime të forta për variantin që tregon ai në polici.
Policia konfirmoi se Shima nuk ishte ndaluar dhe më pas ai u paraqit vetë në komisariatin nr.1, duke thënë se kishte ikur pas një sherri me të dashurën.
Bëhet e ditur se Shima kishte kërkuar para me fajde dhe po investonte shuma të mëdha në biznese, çka tregon për presione dhe probleme financiare që po kalonte pas shkarkimit nga AKSHI në mars 2024, një ditë pas seancës së SPAK ku u mor në pyetje shefja e AKSHI-t, Mirlinda Karçanaj.
Vlen të theksohet edhe që ish-zv.kryeministri Arben Ahmetaj në një intervistë nga arratia në korrik të vitit 2024, foli për një përgjim ambiental të kapur nga SPAK për tendera në vlerën e 43 milionë eurove ose 43 miliardë lekëve, përmes Agjencisë Kombëtare të Shoqërisë së Informacionit. Sipas Ahmetajt, Daniel Shima është kërcënuar nga Rama që të mbyllë gojës.
“AKSHI është tmerr. Danieli është kërcënuar. Tani ata që e kuptojnë e dinë shumë mirë që të mbylli gojën. Danieli është kërcënuar nga vetë kryeministri që të mbyllë gojën. Le të dalë e të bëjë batuta, jo tha… Po, drejt për së drejti. Ta thashë edhe njëherë, le të dalë me batuta. Ky i kërkuari, ky derri në pyll, ky pa atdhe” deklaroi atëherë Ahmetaj.
Edhe për kreun e PD-së, Sali Berishën nuk ka dyshime se Shima është i rrëmbyer. Pikëpyetja që ka Berisha është një tjetër. “A përfundoi Shima në bodrumet e Suel Çelës apo në tunelet e Dajtit të Surrelit, këtë të vërtetë nuk mund ta themi me siguri. Por një gjë është absolute e sigurt, se ai u rrëmbye” u shpreh ai në një konferencë për mediat.
Discussion about this post