Policia e Shkodrës në bashkëpunim me Forcën e Posaçme “Shqiponja”, kanë arrestuar 2 vëllezërit me inicialet S. D., 34 vjeç dhe I. D., 26 vjeç, banues në fshatin Oblikë, pasi ishin shpallur në kërkim si bashkëpunëtorë për kultivimin e 246 kilogramëve kanabis.
Nga hetimet e kryera, rezultoi se dy vëllezërit në bashkëpunim me 12 persona të tjerë, 6 prej tyre të arrestuar, 6 të tjerë ende në kërkim, kultivonin bimë narkotike në fshatin Vallas të Shkodrës.
Si rezultat i kontrollit të zhvilluar më 20 qershor 2022 në banesën e njërit prej bashkëpunëtorëve të dy vëllezërve, personit të arrestuar me inicialet A. T., policia gjeti dhe sekuestroi 246 kilogramë lëndë narkotike kanabis. Me dy arrestimet e sotme, shkon në 8 numri i të ndaluarve në kuadër të operacionit policor të koduar “Vallas”.
Materialet u referuan në Prokurorinë pranë Gjykatës së Shkallës së Parë Shkodër, për veprime të mëtejshme.
Discussion about this post