Një histori e pazakontë vjen nga Shtetet e Bashkuara të Amerikës. Protagonist është Maurice Hastings, i cili kaloi gati 40 vite në burg, pasi akuzohej për përdhunim dhe vrasje. Por provat e reja të ADN, treguan se ishte i pafajshëm. Ai kreu më shumë se 38 vjet burg për vrasjen e Roberta Wydermyer në 1983 në Kaliforni dhe dy tentativa për vrasje.
Por provat e reja të ADN-së treguan se autori ishte një burrë tjetër që vdiq në burg në vitin 2020. 69 vjeçari Hastings u lirua nga burgu pasi dënimit të tij në vitin 1988.
Prokurori i Qarkut të LA, George Gascón e përshkroi dënimin e tij si një “padrejtësi të tmerrshme”.
“Sistemi i drejtësisë nuk është i përsosur dhe kur mësojmë për prova të reja që na bëjnë të humbasim besimin në një dënim, është detyrimi ynë që të veprojmë me shpejtësi”, shtoi ai në një deklaratë.
Roberta Wydermyer u gjet në bagazhin e makinës së saj e qëlluar me plumb në kokë në vitin 1983. Para e të vritej ishte abuzuar seksualisht.
Hastings u akuzua për vrasjen e saj dhe prokurorët kërkuan dënimin me vdekje. Ai u dënua në 1988 me burgim të përjetshëm pa mundësinë e lirimit me kusht.
Në momentin e autopsisë së viktimës, sperma u gjet me anë të një tamponi në gojën e saj. Hastings kishte deklaruar se ishte i pafajshëm që nga momenti kur u arrestua, por një kërkesë për testimin e ADN-së në vitin 2000 u refuzua nga prokurori i qarkut.
Ai apeloi sërish në vitin 2021 dhe testimi i ADN-së në qershor zbuloi se sperma nuk ishte e tij. Profili i ADN-së përputhej me një burrë që ishte dënuar për rrëmbim nën kërcënimin e armës, ku kishte marrë me forcë viktimën dhe e kishte vendosur në bagazhin e makinës së tij.
Pas seancës gjyqësore më 20 tetor, Hastings u tha gazetarëve se donte të shijonte pjesën tjetër të jetës së tij.
“Jam lutur për shumë vite që kjo ditë të vinte,” tha Hastings. “Unë nuk po drejtoj gishtin, por thjesht dua të shijoj jetën time tani.”
Discussion about this post