Klinton Pira, 26 vjeç, kishte 3 vite që jetonte në Angli dhe sapo ishte kthyer gati një muaj më parë. Burimet bëjnë me dije se i riu, me origjinë nga Dibra, kishte shkuar në Britani të Madhe në mënyrë të paligjshme, duke u martuar me 31-vjeçaren Jawsackie Jaboah për të siguruar edhe ai dokumentet franceze. Megjithatë duket se marrëveshja u kthye në një histori dashurie, por që sot përfundoi në tragjedi.
Mësohet se familja Pira me origjinë nga Dibra jetonin prej rreth 30 vitesh në zonën e “Don Boskos” në Tiranë, ku tanimë qëndron vetëm e ëma, pasi edhe vëllezërit e tij jetojnë jashtë vendit.
Por 3 vite më parë, Klintoni që sapo kishte mbërritur në Britani e Madhe humbi të atin, Genci Pira u gjet i vetëvarur në zonën e Korçës. Ai ishte nisur përmes kufirit të gjelbër të kalonte në mënyrë të paligjshme pasi punonte me sezone atje, por rrugës vendosi që t’i jepte fund jetës. Klintoni e kishte përjetuar dramatikisht humbjen e të atit, madje që atëherë ai kishte ndërprerë kontaktet me shoqërinë në Tiranë, por edhe me ata që e ndihmuan apo shoqëruan drejt Anglisë.
Vdekja e babait u konsiderua si vetëvarje, por në polici familjarët kishin deklaruar dyshimet e tyre për vrasje për shkak të një hasmërie të vjetër me një familje tjetër nga Dibra.
