Rafael Duamena duhet të jetë një ndër lojtarët më të keqardhur për këtë eliminim të Egnatias, pasi shënoi dopietë dhe një penallti të goditur me guxim në stilin “panenka”.
Në një intervistë ekskluzive për median sportive “Panorama Sport” pas takimit ndaj Ararat-Armenia, sulmuesi pohon se ekipi bëri më të mirën e vet, por futbolli ndonjëherë është i pamëshirshëm.
Çdo arritje në aspektin personal ai e lidh me skuadrën, në një kohë që si për ironi golat i shënoi pasi ndërroi këpucën.
Ai është i qartë edhe për të ardhmen, ku do të qëndrojë tek Egnatia dhe shpreson që këtë sezon të fitojnë kampionatin për të lumturuar tifozët.
Sa i keqardhur ndiheni të eliminoheni në këtë mënyrë?
Së pari, kjo ishte hera e parë për Egnatian që merrte pjesë në këtë kompeticion. Bëmë më të mirën tonë dhe ekipi zhvilloi një ndeshje të mirë, ku dhanë të gjithë maksimumin. Të vjen keq të eliminohesh në këtë mënyrë, por ky është futbolli, i pamëshirshëm. Por jam krenar për skuadrën dhe shokët. Tani të shpresojmë të bëjmë akoma më mirë në kampionat.
Personalisht sa i kënaqur jeni, shënuat dy gola dhe penalltinë…
Jam i kënaqur për ndihmën që më dha skuadra, sepse i vetëm nuk mund të bësh asgjë. Ishte e gjitha punë e skuadrës, sepse punojmë bashkë me lojtarët, trajnerin. Jam krenar për skuadrën.
Shënuat golat pasi ndërruat këpucët. Ishte ky çelësi i suksesit për të shkuar te to?
(Qesh). Jo, jo. Nuk ndodhi prej këtyre. Thjesht nuk ndihesha rehat me ato të parat.
Cila do të jetë e ardhmja juaj, pasi jeni një emër i lakuar në merkato?
Jo, jo, unë jam këtu. Sapo firmosa kontratën time të re me klubin. Jam pjesë e Egnatias dhe do të mundohem të jap më të mirën për këtë skuadër.
Sezonin e ardhshëm klubi ka shfaqur ambicien për t’u shpallur kampion. Mendoni se do t’ia dilni?
Normalisht e dimë që do të jetë një sezon i vështirë, bëhet fjalë për futboll. Ne do të tregojmë karakter, të bëjmë maksimumin tonë për të bërë të lumtur klubin, por edhe tifozët tanë./PanoramaSport
Discussion about this post