Policia e Tiranës arrestoi ditën e sotme një 45-vjeçar i cili ka aksidentuar në rrugën “Asim Vokshi” shtetasin me iniciale Z. K., 73 vjeç. Mësohet se si pasojë e plagëve të marra qytetari ka ndërruar jetë në spital, ndërsa drejtuesi i mjetit është larguar.
Sipas policisë ai drejtonte automjetin në gjendje të dehur dhe nën efektin e lëndëve narkotike.
Nga ana tjetër, në përfundim të veprimeve procedurale, është bërë arrestimi në flagrancë i këtij shtetasi, për veprat penale “Drejtimi i automjeteve në mënyrë të parregullt”, “Shkelja e rregullave të qarkullimit rrugor”, “Largimi nga vendi i aksidentit”, dhe Gjykata e Rrethit Gjyqësor Tiranë ka caktuar ndaj tij masën e sigurisë “Arrest me burg”.
Gjithashtu, këtij shtetasi iu pezullua leja e drejtimit për 24 muaj, iu zbritën 15 pikë nga leja e drejtimit dhe iu vendos masa administrative 35.000 lekë të reja.
Kujtojmë se, ky është rasti i katërt, brenda dy javëve, gjatë të cilit Policia Rrugore e Tiranës arreston drejtues mjetesh që përdorin mjetet nën efektin e lëndëve narkotike.
Discussion about this post