Mëngjesin e sotëm forcat operacionale në vend parandaluan një ngjarje kriminale duke vënë në pranga 3 persona me rrezikshmëri të lartë shoqërore dhe të shkuar kriminale. Sakaq një detaj i rëndësishëm është zbuluar pas hetimeve lidhur me të arrestuarit. Mësohet se Aldi Mustafa, 35 vjeç, banues në Durrës, rezulton i dënuar për veprat penale “Kanosja” dhe “Prodhimi dhe shitja e narkotikëve”, po ashtu i dënuar më parë me 10 vite burg, në Gjermani, nuk është një emër i panjohur për policinë. Ndër të tjera Mustafa më herët ka qenë anëtar i një bande të njohur në Durrës, ndërsa kohët e fundit ka pasur lidhje me ‘Rrumin’, një personazh i njohur dhe i përfolur në ngjarje kriminale, siç ishte dhe atentati ndaj ish-prokurorit Arjan Ndoja.
I riu me të shkuar të theksuar kriminale, është shok i Alekasandër Lahos, ose ndryshe Pëllumb Muharremit, i njohur si i ‘Forti i Shijakut’, i cili i shpëtoi atentatit që iu bë makinës së ish-prokurorit. Në kuadër të operacionit të koduar ‘Misioni’, policia arrestoi sot përveç Mustafës edhe dy të tjerë, Uran Zykën, 40 vjeç, banues në Durrës, i dënuar më parë për veprën penale “Kanosja”.
Të dy këta shtetas janë me precedent të theksuar kriminal në fushën e krimeve ndaj personit si dhe Tahir Gjinikën, 33 vjeç, banues në Durrës. Tre të ndaluarit dyshohet se do kryenin një vrasje, kundrejt pagesës. Sekuestrohen 3 pistoleta me fishekë në fole dhe 1 mitraloz me fishekë në fole, gati për qitje, municion luftarak, vlera monetare dhe sende të tjera.
Këta shtetas qarkullonin në lagjen nr.15, Durrës, me mjetin tip “BMË”, me drejtues shtetasin Aldi Mustafa. Në momentin e ndërhyrjes nga shërbimet e Policisë, të tre shtetasit kanë tentuar të largohen duke goditur mjetin e shërbimit të Policisë dhe duke rrezikuar jetën e punonjësve të Policisë që ishin në operacion, por nuk kanë mundur dot pasi janë bllokuar nga mjete dhe shërbime të tjera të Policisë.
Gjatë kontrollit të ushtruar në mjet u gjetën: 3 armë zjarri pistoletë me fishekë në fole, 1 armë zjarri mitraloz me fishekë në fole gati për qitje, municion luftarak, 2 laptopë, 9 telefona celularë dhe 1600 euro, të cilat u sekuestruan në cilësinë e provës materiale së bashku me automjetin. Aktualisht policia po heton në lidhje me ngjarjen në fjalë si dhe personin që ishte vënë nën shënjestrën e tyre
