Italia dhe Polonia bien dakord për ndalimin e emigracionit të paligjshëm

“Për çështjen e emigrantëve, Italia dhe Polonia kanë një pozicion të përbashkët. Ne duam të ndalojmë emigrimin e paligjshëm”.

Kështu deklaroi kryeministrja italiane Giorgia Meloni pas takimit dypalësh në Varshavë me kryeministrin polak Mateusz Morawiecki.

“Përderisa Evropa mendon për zgjidhjen e problemit duke diskutuar se si të menaxhohet emigracioni i paligjshëm kur ai të arrijë në territorin evropian, ne nuk do ta gjejmë kurrë zgjidhjen reale”, nënvizoi Meloni.

“Ajo për të cilën ne të gjithë mund të biem dakord – shtoi ajo – është ndalimi i emigrimit të paligjshëm përpara se të arrijë tek ne”.

Nga ana e tij, kryeministri polak Morawiecki theksoi: “Çdo vend duhet të jetë përgjegjës për të vendosur sa dhe cilët emigrantë të pranojë”.