Banka Qendrore e Italisë ka ngrirë asetet që u përkasin oligarkëve rusë me vlerë rreth 2 miliardë euro (2.2 miliardë dollarë) që nga pushtimi i Ukrainës vitin e kaluar.
Si pjesë e sanksioneve të BE-së kundër Kremlinit dhe mbështetësve të tij, Italia sekuestroi asete që përfshinin llogari bankare, vila luksoze, jahte dhe makina, shkruajnë mediat e huaja.
Drejtori i njësisë kundër pastrimit të parave të Italisë, Enzo Serata, tha se zotërimet financiare me vlerë rreth 330 milionë euro (360 milionë dollarë) të lidhura me 80 individë ishin ngrirë.
Para luftës, plazhet dhe portet e Italisë ishin të njohura për rusët e pasur të cilët blenë prona në vende kryesore, si liqeni i Komos, Sardenja, Toskana dhe bregdeti i Ligurisë.
Ndërkohë, presidenti ukrainas, Volodymyr Zelensky foli me kryeministrin suedez Ulf Kristersson dhe e falënderoi atë për dy paketat e sanksioneve kundër Rusisë gjatë presidencës së saj gjashtëmujore të Këshillit të Bashkimit Evropian.
Në Twitter, Zelensky shkroi: “Ne diskutuam situatën në fushën e betejës dhe zhvillimet e fundit në Rusi. Kjo është dëshmi e një përçarjeje në shoqërinë ruse dhe dobësisë së pushtetit vertikal”.
“Në rrethana të tilla, presioni i mëtejshëm politik mbi Rusinë dhe mbështetja ushtarake për Ukrainën do të jenë më efektive. Ne ramë dakord të koordinojmë përpjekjet për të afruar anëtarësimin në NATO për Ukrainën dhe Suedinë”.
“Ne diskutuam gjithashtu ritmin e zbatimit të marrëveshjeve të mëparshme për mbështetjen e mbrojtjes nga Suedia. I përcolla Kristersson-it nevojat e mëtejshme të Ukrainës, veçanërisht për forcimin e mbrojtjes ajrore”.
Discussion about this post