Në aeroportin e Hamburgut në Gjermani, shqiptarët kanë protestuar për shkak të shtyrjes së fluturimit që ishte planifikuar më 4 korrik. Ngjarja e ditëve më parë është raportuar nga RTL. Sipas tyre, është dashur ndihma e 16 makine policie për të qetësuar revoltën e pasagjerëve të avionit që do fluturonte nga Hamburgu drejt Tiranës.
Gjithçka nisi kur u njoftua se fluturimi i datës 4 korrik do shtyhej për një ditë më vonë për shkak se avioni kishte pësuar një defekt teknik. Ditën tjetër, avioni mbërriti shumë vonë nga Tirana dhe autoritetet thanë se ai nuk mund të ngrihej në fluturim për shkak të një vendimi të Autoritetit Kundër Zhurmave. Për shkak se nuk lejohet fluturimi natën, 250 pasagjerët shqiptarë duhej të prisnin edhe një ditë tjetër ndaj nisën revoltën pasi kishin më shumë frikë se mos u skadonte rezultati i testeve të Covid.
Vetëm pas shumë negociatash, avioni u nis në fluturim në orët e para të mëngjesit të 6 korrikut. Ngjarja në fjalë ka ndezur një debat në parlamentin vendor, për shkak të cenimit të sigurisë në aeroport, por edhe për të vënë në diskutim ndalimin e fluturimit natën.
