Kuvendi vendosi sot heqjen e imunitetit për kreun demokrat Sali Berisha, duke i hapur kështu rrugën SPAK që të kërkojë në GJKKO vendosjen e një mase sigurie më të fortë ndaj ish-Kryeministrit, atë të “arrestit me burg ose shtëpie.
E ndërsa “topi” ndodhet në këmbët e SPAK për kohën se kur do t’i drejtohet GJKKO-së, Berisha duket se ka nisur lëvizjet e njëpasnjëshme politike.
Pas protestës së organizuar përpara selisë së Parlamentit dhe konsultimeve që ka zhvilluar me deputetët e PD-së, pasditen e sotme në selinë e kësaj partie, kreu demokrat ka thirrur një mbledhje të Kryesisë.
“Në ora 18:30 do të zhvillohet mbledhja e Kryesisë së Partisë Demokratike në sallën “Azem Hajdari”, selia PD”, thuhet në një njoftim zyrtar.
Mbledhja e Kryesisë pritet të pasohet nga një tjetër mbledhje, atë të kryetarëve të degëve dhe më pas të Këshillit Kombëtar.
Duket se Berisha po tenton të përcjellë te mbështetësit e tij frymën e një beteje me atë që e quan regjimin e Edi Ramës dhe nisjen e një vale protestash, në kuadër të aksionit opozitar, përfshirë edhe mosbindjen civile.
Discussion about this post