Një 37-vjeçar shqiptar ka përfunduar në pranga në Itali, disa muaj pasi u arratis pas një tentative grabitjeje që degjeneroi në dhunë ndaj forcave të rendit.
Ngjarja daton në tetor të vitit 2025, në Arzago d’Adda, ku ai, së bashku me një bashkëpunëtor, tentuan të hynin me forcë në banesën e një 85-vjeçari. Ndërhyrja e karabinierëve çoi në një përplasje të dhunshme, gjatë së cilës dyshja përdori spraj irritues dhe mjete të forta për të goditur efektivët, raportojnë mediat italiane.
Si pasojë, një karabinier përfundoi në spital me nofull të thyer dhe lëndime në kokë, ndërsa autori kryesor arriti të largohej nga vendngjarja. Bashkëpunëtori i tij, një 47-vjeçar shqiptar, u arrestua në moment.
Pas muajsh hetimesh dhe analizash të kamerave të sigurisë, autoritetet arritën të identifikonin dhe lokalizonin të arratisurin, i cili jetonte në Cassano d’Adda dhe rezultonte i papunë dhe me precedentë penalë.
Arrestimi u krye natën e 14 marsit në banesën e tij, ku gjatë kontrollit policia gjeti edhe sende ari me origjinë të paqartë si dhe një taser të paligjshëm, duke rënduar më tej pozitat e tij ligjore.
Mësohet se në momentin e ngjarjes, 37-vjeçari ishte nën një masë alternative sigurie, çka e bën edhe më të rëndë situatën e tij. Me vendim të autoriteteve italiane, ai është dërguar në burgun e San Vittore në Milano, ndërsa ndaj tij rëndojnë disa akuza të rënda.
Discussion about this post