Pas dy ditëve protestë për mos marrjen e pagave, punonjësit e sektorit të riciklimit në inceneratorin e Elbasanit, i janë rikthyer punës. Kjo, pasi përgjegjësi i Inspektoratit të Punës në Elbasan, Egliver Laloshi, iu garantoi se çështja e pagave do të zgjidhet brenda javës tjetër.
“Me llafin e institutucionit që unë jam i përfaqësuar, ku jam i punësuar dhe me ok e punëdhënësit tuaj, por edhe bashkisë së Elbasanit, brenda javës që vjen mendoj se problemi juaj do të jetë i zgjidhur”, u tha protestuesve përgjegjësi i Inspektoratit të Elbasanit.
Duke i mbajtur dorën në shenjë besimi dhe respekti njërit prej protestuesve, Laloshi u bëri thirrje punonjësve të sektorit të riciklimit t’i kthehen punës, pasi këta të fundit kanë dy ditë që kanë lënë punën.
Një javë më parë, anëtarët e komisionit hetimor parlamentar për inceneratorët zbarkuan në impiantin e mbetjeve në Elbasan, ku deklaruan se ky impiant nuk i ka pastruar mbetjet por e ka shtuar ndotjen për shkak se kontrata nuk ka parashikuar eleminimin e hireve të rrezikshme të inceneratorit.
Discussion about this post