Ish-deputeti i PD, Fatbardh Kadilli ka prezantuar ditën e sotme krijimin e një partie të re opozitare e quajtur “IDE”, që në thelb sipas tij, do të jetë një formacion brenda PD.
Në prezantimin e partisë së re, Kadilli është shprehur se lëvizja e re është e hapur për të gjithë qytetarët dhe politikanët, ndërsa u shpreh se kjo lëvizje do të sjellë meritokraci.
“Një PD e pastër, e bashkuar, dhe fituese. Iniciative Demokratike është sot përgjigja që ne kemi përballë demokratëve dhe qytetarëve që duam të kemi në opozitë. Përplasja e brendshme po na shkatërron fuqitë tona politike. Ne do të bëjmë një opozitë me propozim të besueshëm nga njerëz të besueshëm në dobi të qytetarëve, ne sot shpallim krijimin e një nisme të re që bazohet në raportet sociale, politike morale. Partia mund të bëhet monopol, opozitarizmi jo. Struktura e re ka në përbërje të saj politikanë me përvojë profesionale dhe lëvizja është e hapur për të gjithë politikanët dhe qytetarët. Është një strukturë vetëvepruese dhe nuk merr leje dhe ideologjie. Te konkurrenca, guximi dhe pastërtia qëndron dallimi që ne duam të bëjmë. Do të sjellë dobi për qytetarin do të sjellë konkurrencën dhe meritokracinë. Ne kemi pastërtinë të përballemi me të keqen. Qëllimi është një Shqipëri e mire dhe konkurruese, këto janë ato që na motivojnë”, ka thënë Kadilli.
Çfarë ra në sy ishte mbështetja nga figura të rëndësishme të PD, si sekretari ligjor Ivi Kaso dhe analisti i njohur për prirjet e tij opozitare Artan Hoxha. Kaso garoi në zgjedhjet e PD nën siglën e PD në Tiranë, por nuk arriti të siguronte asnjë mandat.
Vetë Kadilli kandidoi kundër Lulzim Bashës për postin e kreut të PD në zgjedhjet e 13 qershorit, por nuk arriti të fitonte pasi siguroi vetëm 781 vota.
