Vrasja e Azem Hajdarit është rikthyer sërish në vëmendje. Izet Haxhia i akuzuar si i implikuar në këtë ngjarje ka dëshmuar se nuk ishte ai që e nxori në pritë të ndjerin Hajdari, por para se të vritje kishte një takim me Sali Berishën.
“Nuk e nxora unë Azem Hajdarin në pritë. Para se të vritej, Hajdari ishte në takim me Sali Berishën. Azemi u njoftua se jashtë PD ishte një mjet me tritol. Kur e informoi këshilltari, ishte në zyrën e Berishës. Kur doli te makina, Azemi trokiti te xhami. Jaho Mulosmani ishte shofer i makinës, nuk qëlloi. Ai që qëlloi ishte Fatmir Haklaj. Kur ndodhi ngjarja, unë isha me Halil Haklajn. Unë e Azemi kemi qenë bashkëthemelues të PD. Jam ndjerë shumë i përdorur. Vrasja u bë për të rrëzuar Fatos Nanon. Fatmir Haklaj më tha se nuk kishte shkuar për të vrarë Azemin.”, tha Haxhia.
Në deklarimet e tij në gjykatë, Izet Haxhia ka rrëfyer të gjithë dinamikën e vrasjes së Azem Hajdarit në 12 shtator 1998. Haxhia është dënuar pas vrasjes së Hajdarit, por pas rikthimit nga Turqia u vendos të rigjykohej duke rihapur çështjen ndaj tij. Pas disa vitesh procese ai ka mbërritur në fazën finale. Gjykata kishte mbyllur hetimin gjyqësor në mungesë të tij dhe dje do të jepte pretencën prokurori për të kërkuar dënimin e tij.
Avokati i tij, Idajet Beqiri, i ka kërkuar gjykatës të riçelë hetimin gjyqësor dhe të dëgjonte deklarimet e Izet Haxhisë, sepse mungesat e tij në seancat paraardhëse të gjykimit ishin të arsyetuara për shkak të gjendjes jo të mirë shëndetësore të tij. Kjo kërkesë u pranua nga gjykata dhe Izet Haxhia bëri një rrëfim të situatës nga njohja me Azem Hajdarin në nëntor 1990 dhe me Sali Berishën në dhjetor 1990, marrëdhëniet reale Berisha-Hajdari ndër vite, deri në vrasjen e Azem Hajdarit. Në apologjinë e Izet Haxhisë para gjykatës kishte brenda fakte dhe ngjarje që dëgjoheshin për herë të parë. Ai vijon t’i qëndrojë deklaratave se nuk ka lidhje me këtë ngjarje, ndërkohë që gishtin duket se e ka drejtuar nga ish-kryeministri Sali Berisha, pasi ka dyshime se ai ka qenë i implikuar në nxjerrjen e Hajdarit në pritë.
Discussion about this post