Prej më shumë se një jave aksi rrugor Theth-Qafë Thore vijon të jetë i bllokuar nga reshjet e shumta të rëna të dëborës. Bëhet me dije se trashësia e borës të rënë gjatë natës ka shkuar deri në 50-60 cm, duke paralizuar kështu të gjithë banorët, por edhe turistët që kanë zgjedhur Thethin si destinacion për të kaluar pushimet. Ndërkohë, përgjatë natës bëhet e ditur se ka pasur edhe problematika me orteqet, për shkak të borës së madhe.
Edhe pse u rikonstruktua nga ana e qeverisë, projekti për rrugën e Thethit parashikonte të rehabilitojë 16 km nga Qafë-Thorja deri në qendrën e fshatit Theth, me një siguri të lartë rrugore për shkak të terrenit të vështirë malor dhe kushteve klimaterike. Por siç duket ky premtim nuk u arrit të realizohet, pasi këtë fillim dimri që në reshjet e para të dëborës ky fshat u bllokua dhe banorët ngelën të izoluar.
Banorët bëjnë apel që masat nga ana e pushtetit vendor por edhe atij qendror që të bëhet e mundur hapja e këtij aksi rrugor dhe në dispozicion të qëndroj një borëpastruese për të normalizuar situatën. Pasi sipas banorëve, jo më larg se dy ditë me parë një foshnje pesë muajsh ka qenë sëmurë dhe ambulanca nuk ka arritur të shkonte deri në destinacionin e kërkuar nga këta të fundit. Ndonëse hera-herës pothuajse çdo ditë, banorët e Thethit kërkojnë “ndihmë” nga ana e institucioneve, por më kot pasi gjithë këto bien në vesh të shurdhët. Ndër të tjera, banorët pohojnë se ndihen të harruar e të gjithë kujtohen për to vetëm në periudhën e fushatës elektorale duke kërkuar votat.
Thethi është një ndër zonat më problematike gjatë stinës së dimrit përsa i përket reshjeve të borës dhe rruga nuk mirëmbahet nga një kompani kontraktuese për zhbllokimin e saj, por vetëm përmes ndërhyrjes së ARRSH dhe Prefekturës Shkodër.
Discussion about this post