Forcat e armatosura izraelite akuzuan sot grupin islamik palestinez Hamas për përdorimin e civilëve si “mburoja njerëzore”.
Hamasi po “fsheh gjithashtu infrastrukturën terroriste në zonat civile” në Rripin e Gazës, tha Forcat e Mbrojtjes së Izraelit (IDF) në një postim në platformën X.
Në një listë të “krimeve të luftës” të Hamasit, të postuar në të njëjtën media sociale, Forcat e armatosura izraelite deklarojnë gjithashtu se Hamasi angazhohet në “përdhosje dhe gjymtim të të vdekurve”, “vrasje të qëllimshme të civilëve” dhe “rrëmbim dhe marrje pengjesh të civilëve”.
Hamasi, i cili sundon Rripin e Gazës, nisi një sulm të befasishëm ndaj Izraelit të shtunën në mëngjes. Palestinezët e armatosur hynë në Izrael nga toka, deti dhe ajri.
Grupi palestinez, i cili është cilësuar si organizatë terroriste nga Bashkimi Evropian, Shtetet e Bashkuara dhe Izraeli, që atëherë ka lëshuar mijëra raketa në drejtim të Izraelit. Vendi u përgjigj me kundërsulme.
Hamasi ka vrarë qindra izraelitë dhe ka rrëmbyer më shumë se 100 njerëz, duke përfshirë gra, fëmijë dhe të moshuar, dhe i ka çuar në Rripin e Gazës, sipas Izraelit. Si përgjigje, Forcat Ajrore izraelite bombarduan objektivat e Hamasit në enklavë.
Discussion about this post