Izraeli ka akuzuar Hamasin për një sulm ndaj forcave të tij në Rafah të Gazës jugore, vetëm nëntë ditë pas hyrjes në fuqi të armëpushimit të ndërmjetësuar nga SHBA, duke e cilësuar incidentin si testin e parë të madh për marrëveshjen e brishtë.
Zyrtari izraelit, i njohur me zhvillimet, konfirmoi se si pasojë e sulmit ka pasur viktima në radhët e ushtrisë izraelite. Ngjarja ka ndodhur përtej “Vijës së Verdhë”. kufiri fillestar i tërheqjes së Izraelit sipas marrëveshjes së armëpushimit.
Kryeministri Benjamin Netanyahu pritet të mbledhë mëngjesin e së dielës një takim urgjent të sigurisë me ministrin e Mbrojtjes dhe shefin e ushtrisë, për të analizuar situatën dhe hapat e mëtejshëm.
Nga ana tjetër, Hamasi nuk ka komentuar drejtpërdrejt mbi akuzat, por një zyrtar i lartë i grupit, Izzat Al-Rishq, tha në një deklaratë në Telegram se grupi mbetet i përkushtuar ndaj marrëveshjes së armëpushimit, duke akuzuar Izraelin se “po sajon pretekste të dobëta për të justifikuar krimet e tij”.
Ngjarja rrezikon të rikthejë tensionet në një nga periudhat më të brishta të konfliktit, duke vënë në pikëpyetje të ardhmen e marrëveshjes së arritur me ndërmjetësimin e Shteteve të Bashkuara.
Discussion about this post