Lirimi i pengjeve nën një armëpushim të përkohshëm midis Izraelit dhe grupit islamik palestinez Hamas nuk do të ndodhë deri nesër, të premten, njoftuan këshilltari i sigurisë kombëtare i Izraelit dhe Shtetet e Bashkuara, duke shkatërruar shpresat e të afërmve se disa mund të lirohen sot.
Izraeli dhe Hamasi ranë dakord herët të mërkurën për një armëpushim në Gaza për të paktën katër ditë për të lejuar mbërritjen e ndihmave humanitare dhe lirimin e të paktën 50 pengjeve të mbajtura nga militantët në enklavë, në këmbim të lirimit të të paktën 150 palestinezëve të burgosur në Izraeli.
Nuk është bërë ende e ditur zyrtarisht koha e fillimit të armëpushimit dhe lirimit të pengjeve të marra nga Hamasi gjatë sulmit të 7 tetorit ndaj Izraelit. Një burim në forcat egjiptiane të sigurisë tha se ndërmjetësit kishin kërkuar të fillonin procesin në orën 10 të mëngjesit të sotëm.
Një zyrtar palestinez i tha AFP sot se armëpushimi u shty për shkak të bisedimeve të “minutit të fundit” mbi “emrat e pengjeve izraelitë dhe mënyrën se si ata do t’i dorëzohen” një pale të tretë.
“Katari, në koordinim me egjiptianët dhe amerikanët, do të shpallë sot brenda orëve të ardhshme” kohën e fillimit të armëpushimit, sqaroi ai.
Gjithashtu duke folur këtë mëngjes, zëdhënësi i Ministrisë së Jashtme të Katarit, Majin bin Mohammed Al Ansari tha se një njoftim për fillimin e armëpushimit mund të bëhet brenda orëve të ardhshme. Katari ndërmjetësoi negociatat për armëpushim.
Discussion about this post