Izraeli ka sulmuar me avionë luftarakë poste dhe objekte të Lëvizjes së Rezistencës Islamike, Hamas, thanë burimet palestineze të sigurisë dhe dëshmitarët okularë. Sulmet, të cilat kishin në shënjestër postet ushtarake që i përkisnin Brigadave të krahut të armatosur të Hamasit, al-Qassam pranë qytetit jugor të Rripit të Gazës, Khan Younis, shkaktuan dëme të mëdha në objektet stërvitore, pa raportim të menjëhershëm të të lënduarve, thanë burimet për Xinhua.
Mediat e huaja raportojnë se shpërthime të mëdha u dëgjuan në zonë dhe militantët e Hamasit qëlluan përsëri kundër avionëve luftarakë sulmues, thanë dëshmitarët okularë. Sulmet ajrore në objektet e Hamasit ishin një përgjigje ndaj lëshimit të mëparshëm të balonave ndezëse nga Rripi i Gazës drejt Izraelit, tha një zëdhënës i ushtrisë izraelite në një deklaratë për shtyp.
Avionët luftarakë izraelitë goditën një fabrikë që prodhon çimento të përdorur për ndërtimin e tuneleve nëntokësore dhe një fabrikë tjetër që prodhon raketa dhe predha të improvizuara, shtoi zëdhënësi.
Zëdhënësi i Hamasit Hazem Qassem tha se sulmet ajrore në Rripin e Gazës “shprehin dështimin e Izraelit për t’u përballur me luftën e popullit palestinez, kryesisht pas arratisjes së gjashtë të burgosurve palestinezë nga një burg izraelit”.
Izraeli ka nisur sulme të shumta ajrore në Rripin e Gazës që nga përfundimi i raundit të fundit të tensionit midis Izraelit dhe militantëve të udhëhequr nga Hamasi, i cili zgjati 11 ditë dhe përfundoi më 21 maj, duke lënë më shumë se 250 palestinezë dhe 13 izraelitë të vdekur.
