Zëvendëspresidenti i Shteteve të Bashkuara të Amerikës, J.D. Vance, ka zhvilluar sot një takim zyrtar në Jerusalem me kryeministrin izraelit, Benjamin Netanyahu. Në konferencën e përbashkët për shtyp pas takimit, Vance tha se misioni për çarmatimin e Hamasit dhe rindërtimin e Gazës mbetet një prej sfidave më të mëdha në rajon.
“Kemi një mision shumë, shumë të vështirë përpara nesh – çarmatimin e Hamasit dhe rindërtimin e Gazës – për ta bërë jetën më të mirë për popullin e Gazës, por edhe për t’u siguruar që Hamasi të mos jetë më një kërcënim për miqtë tanë në Izrael,” deklaroi Vance.
Takimi mes dy zyrtarëve erdhi pak ditë pasi marrëveshja e armëpushimit në Rripin e Gazës hyri në fuqi më 10 tetor. Marrëveshja, e ndërmjetësuar nga Presidenti amerikan Donald Trump, vjen pas më shumë se dy vitesh konflikti të ashpër mes Izraelit dhe Hamasit, që nisi pas sulmeve të 7 tetorit 2023.
Plani 20-pikësh i propozuar nga Shtëpia e Bardhë parashikon çarmatimin e plotë të Hamasit, tërheqjen graduale të ushtrisë izraelite nga Gaza, dërgimin e ndihmave humanitare dhe rindërtimin e zonave të shkatërruara.
Nga ana e tij, kryeministri Netanyahu u shpreh se Izraeli po punon për të krijuar një “të ardhme me vizion të ri” në rajon.
“Po krijojmë një të nesërme të mrekullueshme me një vizion krejt të ri për mënyrën se si do të kemi një qeveri politike dhe si do të sigurojmë sigurinë atje. Kjo nuk do të jetë e lehtë dhe do të kërkojë shumë punë, por unë besoj se është e mundur,” tha Netanyahu.
Discussion about this post