Kryetari i Bashkisë së Tiranës, Erion Veliaj do të paraqitet ditën e enjte në Prokurorinë e Posaçme (SPAK) për të dëshmuar për llogari të një hetimi për “korrupsion” dhe pasuror të nisur nga kjo strukturë ndaj tij.
Burime për mediat bëjnë me dije se ai ishte thirrur sot në SPAK për të dëshmuar, por e ka shtyrë për ditën e enjte, me kërkesë të tij, e cila është pranuar nga ana e SPAK.
Ndërkohë, ditën e djeshme u paraqit në SPAK bashkëshortja e Erion Veliajt, Ajola Xoxa, e cila dëshmoi për rreth 3 orë para oficerëve të BKH-së në lidhje me hetimin në fjalë.
Hetimet për rastin në fjalë po ndiqen nga prokurori Ols Dado. Referuar raportimeve mediatike, SPAK ka indicie se Erion Veliaj dhe të afërmit e tij janë implikuar në skemat e përfitimit të parave në rrjetin e kompanive që ka në pronësi biznesmeni shqiptaro-belg Elman Abule.
Ndaj këtij të fundit ka dhe një hetim nga Prokuroria e Tiranës, ku akuzohet se ka ngritur një skemë të pastrimit të parave, ku është pjesë bashkëshortja e tij bashkë me Kristian Boçin dhe Vladimir Avramin.
Prokuroria u bllokoi rreth 50 milion euro pasuri që ishte investuar kryesisht në ndërtim, pasi paratë kishin origjinë të dyshimtë. Por sekuestro u hoq disa ditë më vonë kur prokurorja e Apelit, Arta Marku u riktheu pronat të akuzuarve.
Mëngjesin e 6 Dhjetorit, agjentët e BKH-së me urdhër të SPAk ushtruan kontrolle në 6 individë, mes të cilëve dhe Ajola Xoxa dhe Arbër Veliaj, bashkëshortja dhe vëllai i kryebashkiakut të Tiranës.
Kontrollet u ushtruar në zyrat e galerisë “Harabel”, fondacion i themeluar në vitin 2018 nga artisti Driant Zeneli dhe “promotorja kulturore” Ajola Xoxa. Gjithashtu, kontrolle u ushtruan edhe në shtëpinë e prindërve të Xoxës, fakt ky i pranuar edhe nga Erion Veliaj në një reagim publik mbi hetimet.
Veç kontrolleve, SPAK urdhëroi dhe sekuestrimin e telefonit të Ajola Xoxës dhe Arbër Veliajt.
Ditën e sotme, Gjykata e Posaçme e Apelit rrëzoi ankimin e bërë nga Ajola Xoxa dhe Arbër Veliaj, të cilët kundërshtonin veprimet e SPAK dhe GJKKO, në lidhje me kontrollin e ushtruar mëngjesin e 6 Dhjetorit
Pak ditë më parë, GJKKO refuzoi dhe kërkesën e tyre për t’ju kthyer sendet e sekuestruara nga SPAK gjatë kontrollit personal dhe disa ambienteve në pronësi të tyre.
Në reagimin mbi hetimet, Erion Veliaj deklaroi se SPAK-u është institucion kushtetues i vendit të tij dhe ai do të jetë totalisht në dispozicion të hetimit, i bindur se, në fund, e vërteta do të triumfojë.
Vlen të theksohet fakti se ditën e enjte, Erion Veliaj do të paraqitet për herë të dytë në SPAK. Më herët ai është paraqitur edhe më 30 Prill të këtij viti, ku dëshmoi për rreth 7 orë në lidhje me inceneratorin e Tiranës.
Pas daljes nga SPAK, Veliaj i quajti hetuesit e Prokurorisë së Posaçmesi “dy kolegë hetues profesionistë dhe të disiplinuar”, teksa shtoi se kishte patur një ezaurim total të çështjes së incineratorëve.
Discussion about this post