Partia italiane e krahut të djathtë, e udhëhequr nga kryeministrja Giorgia Meloni, ka propozuar një ligj të ri që do të dënojë përdorimin e anglishtes dhe fjalëve të tjera të huaja në komunikimet zyrtare me gjoba nga 5,000 deri në 100,000 euro.
Qëllimi i legjislacionit, i cili është dënuar gjerësisht edhe nga studiuesit më të njohur të gjuhësisë dhe filologjisë italiane, Accademia della Crusca, është “të mbrojë dhe promovojë gjuhën italiane” dhe të mbrojë identitetin kombëtar.
Gjuha italiane – si shumica e gjuhëve të tjera në Europë – ka përvetësuar terma anglisht në vitet e fundit, pjesërisht sepse ishin terma që tregonin gjëra “të reja” që nuk i përkisnin traditës italiane dhe jo vetëm (kompjuter, media sociale).
Përvetësimi i fjalëve angleze në gjuhët e tjera është një debat, në të cilin mendimet janë të ndara. Disa argumentojnë në mbrojtje të integritetit të gjuhës kombëtare, ndërsa të tjerë pranojnë dhe vlerësojnë faktin se gjuhët e gjalla janë vazhdimisht në zhvillim dhe pasurohen me elementë të rinj. Për këta të fundit, gjuha zhvillohet me njeriun dhe është e pamundur që të kufizohen ndikimet nga gjuhët e tjera, pjesë e jetës së përditshme të njerëzve.
Discussion about this post