Ish-kryetari i Kuvendit të Kosovës, Jakup Krasniqi doli ditën e sotme para Gjykatës Speciale në Hagë, në një seancë dëgjimore pas dorëzimit të aktakuzës së re, me ndryshime, të cilën Zyra e Prokurorit të Specializuar e dorëzoi në gjykatë në datën 29 prill.
Gjatë kësaj deklaratë Krasniqi u deklarua si i pafajshëm. Nga ana tjetër, ish-zëdhënësi i UÇK-së ka bërë me dije se nuk do ta besonte kurrë që do të akuzohej me akuza të mbështetura në gënjeshtrat e Serbisë. Ai tha se i vjen turp që jeton në këtë kohë.
“Sot po i them disa fjalë. Mbase jam gabim, por kurrë nuk kisha besuar, po të mos ishte ky rast, se juristë të shkolluar në vendet me demokraci liberale, me traditë, që pretendojnë se punojnë në një sistem të drejtësisë në mënyrë për të bërë drejtësi standarde, guxojnë të ngrejnë një akuzë që mbështetet vetëm e vetëm mbi bazën e gënjeshtrave të Serbisë dhe e cila cenon rëndë lirinë, jetën e të drejtën e individit, e madje e godet në palcë të kurrizit të drejtën e një populli për liri e shtetndërtim me një padrejtësi të madhe.”
Gjithashtu, Krasniqi me sy të përlotur është shprehur se i vjen turp që po jeton në një kohë të tillë ku po shkatërrohet jeta e njerëzve dhe familjeve që guxuan të luftojnë për jetën dhe lirinë.
“Mua më vjen turp që po jetoj në këtë kohë të këtij lloj homosapiensi që me kaq lehtësi ua shkatërron jetën njerëzve dhe familjeve që guxuan të luftojnë për jetën në liri, për demokracinë e pavarësinë”.
Sakaq, një detaj të veçantë Krasniqi kishte zgjedhur në veshjen e tij. Kravata e tij ishte me shqiponjën e flamurit kuq e zi, duke shpalosur edhe në Hagë shpirtin patriotik.
Discussion about this post