Ish-sulmuesi i Irlandës dhe i disa klubeve të Premier Leagues, Robbie Keane është emëruar trajner i Maccabi Tel Aviv duke nënshkruar një kontratë dyvjeçare, ka njoftuar të hënën klubi izraelit.
“Jam i lumtur ta provoj këtë sfidë te Maccabi. Ekipi im dhe unë tashmë presim me padurim të fillojmë punën dhe kemi besim në aftësinë tonë për të bërë atë që është e nevojshme”, ka thënë Keane për faqen e klubit.
Për irlandezin ka komentuar edhe pronari i Maccabit, Mitch Goldhar.
“Robbie sjell me vete mentalitetin, karakterin, energjinë dhe fokusin e një fituesi, cilësi që ai i demonstroi kudo ku luajti. Këto karakteristika të kombinuara me ambicien për të pasur sukses si trajner janë në përputhje me synimet tona te Maccabi”, është shprehur ai.
Keane gjatë karrierës së tij ka 146 paraqitje me Irlandën, më së shumti nga të gjithë lojtarët e tjerë, si dhe është futbollisti me më së shumti gola, gjithsej gjashtëdhjetë e tetë. Ai gjatë karrierës së tij ka shënuar më shumë se 300 gola për Tottenham Hotspur, Leeds, Liverpool dhe West Ham United.
Discussion about this post