Boris Johnson ka vendosur të tërhiqet nga gara për kryeministër në Britaninë e Madhe. Me anë të një deklarate për shtyp, ai tha se pjesëmarrja në zgjedhje nuk është hapi më i mirë i mundshëm në këtë moment dhe nuk mund të qeverisë në mënyrë efektive nëse partia e tij nuk është e konsoliduar në parlament.
“Sonte dua të konfirmoj se unë kam mbështetjen e 102 deputetëve ndaj edhe mund të depozitoj kandidaturën time që nesër. Ekziston dhe shansi që unë të fitoj në zgjedhjet brenda Partisë konservatore dhe brenda të premtes mund të rikthehesha në Downing Street. Por jam menduar gjatë ditëve të fundit dhe arrita në konkluzionin se kjo nuk është gjëja më e mirë që mund të bëj momentalisht. Askush nuk mund të qeverisë me nëj parti që nuk është e plotë në Parlament”, shkruan Johnson.
Kështu i hapet rruga Rishi Sunak, i cili duket se do të bëhet kryeministri i ri. Ish-kancelari, i cili nisi zyrtarisht fushatën e tij këtë mëngjes, kishte më shumë se dyfishin e numrit të mbështetësve të deklaruar publikisht se Johnson.
Që nga mbrëmja e sotme, Sunak kishte 146 deputetë konservatorë krah tij, ndërsa Johnson vetëm 57 mbështetës.
Discussion about this post