Ish-deputeti i PD, Ervin Salianji i ftuar në News24, duke iu referua dënimit me burg që mori 1 vit më parë, për kallëzim të rremë publik ndaj ish-ministrit të Brendshëm Fatmir Xhafaj dhe vëllait të tij, Geron se ky i fundit ishte i përfshirë në trafik droge.
Salianji tha burgosja ishte për motive politike e cila erdhi si rrjedhojë e aktivizmit të tij dhe përballjes direkte me kryeministrin Edi Rama në disa beteja elektorale. Salianji tha se ai e ka mundur Ramën dhe si kosto mori dënimin me burg.
Ervin Salianji: Qëllimi i burgosjes time politike ishte për të më shmangur nga aktiviteti politik. I gjithë dënimi për herë të parë në historinë 34-vjeçare të institucioneve, në atë moment të fushatës së 11 majit, por edhe të më pamundësonte aktivitetin politik. Në 2013-2017 nuk kam qenë në Parlament, kur i jam bashkuar PD-së në opozitë, dhe e kam treguar që kam patur intensitet më të madh politik se një pjesë e grupit parlamentar të asaj kohe. Në pikëpamjen e prodhimit të aktivitetit politik nuk është se më pengon, padiskutim që është disavantazh në raportet dhe përplasjet institucionalisht me kundërshtarët se siç e dini ata nuk shfaqen më në media se janë të turpëruar. Edhe kur dalin kanë një lloj turpërimi që e kanë instiktiv, se të vetëdijshëm nuk kanë turp e cipë, por kanë një lloj turpërimi për ato që kanë bërë.
Dënimi im ishte vendimmarrje e kryeministrit. E tha përpara dënimin tim, e tha gjatë kohës që isha në gjykim, shfaq gëzim pas dënimit, ishte i eksituar, i ekzaltuar, ishte në instikt, në një gëzim të madh. Tani që po merrem me çështjen për ta përgatitur për në Strasburg, kam parë që qindra raste që kam denoncuar janë faktuar dhe koha më ka dhënë të drejtë në çdo rast.
Dënimi ka qenë një lloj mesazhi për të gjithë tjerët, që kush e mund, siç unë e kam mundur Edi Ramën, kush bën beteja të drejta, kush nuk dorëzohet, kush nuk thyhet – përfundon në burg. Për mua nuk ndryshon asgjë, dënimi është si një medalje që kam marrë, një kornizë e vënë në zyrë, si një medalje e marrë në betejën me një autokrat që jo vetëm ka dëmtuar Shqipërinë duke çuar në autokraci, por me sa duket po shkatërron edhe bashkëpunëtorët e vet një nga një.
Salianji tha se është në komunikim të vazhdueshëm me Berishën, ndërsa shtoi se partia duhet t’i nënshtrohet ripërtëritjes për të ndryshuar qasjen e funksionimit të strukturave dhe mënyrës së komunikimit me publikun.
Gjithashtu, ish-deputeti demokrat vërejti se “në PD nuk ka rivalitet aq sa duhet të ketë”. “Rivalitetet, konkurrencat, përplasjet, xhelozitë që janë normale në politikë nuk janë aq sa duhet. Si një ekip futbolli ku secili duhet të stërvitet sa më shumë për të kapur vendin në formacion. Vetëm në këtë formë ekipi bëhet më i fortë dhe del kampion”, tha Salianji.
Pyetje: E takoni zotin Berisha? Zhvilloni bisedime me të?
Ervin Salianji: Padiskutim, kam komunikim të vazhdueshëm me zotin Berisha. Duhet të ketë më shumë konkurrencë e rivalitet në PD, për të treguar që garohet qoftë për performancën publike, qoftë për kontaktet me qytetarët. Pra, është një perceptim që është afër të vërtetës që edhe gjatë fushatës elektorale ka qenë kështu që, zoti Berisha ka qenë në distancë në shumë aktivitete, përpjekje dhe beteja se sa po themi, jo të gjithë – dikush më pak, dikush më shumë – por ka patur një lloj apatie në një pjesë të caktuar të drejtuesve apo strukturave të partisë për të ndjekur ritmin e kryetarit të partisë. Nëse do të thosha ndryshe do të isha i pavërtetë. Kjo është pranuar dhe zoti Berisha e ka thënë me një term të fortë mendoj unë, por që besoj se në këtë drejtim duhet të jetë më i shpejtë hapi i PD-së që duhet të ecë, drejt ripërtëritjes së PD dhe një lloj formatimi ndryshe të PD-së, qoftë në pjesën e strukturave, qoftë në pjesën e njerëzve që komunikojnë me publikun.
Salianji deklaroi se komunikimi i akuzave nga Prokuroria e Posaçme për numrin 2 të qeverisë bën përgjegjës edhe Ramën.
“Nëse lajmi për Ballukun konfirmohet zyrtarisht, Edi Rama duhet të dorëhiqet. Belinda Balluku është personi më i rëndësishëm në qeveri, jo vetëm në dukje, por është zv/kryeministre dhe ministrja me portofolin më të madh dhe njeriu me mbështetje politike të fortë, është drejtuesja politike për zgjedhjet e pjesshme të Tiranës. Politikisht është njeriu më i rëndësishëm jo vetëm për shkak të vendimmarrjes, por edhe për shkak të besimit që i ka dhënë Edi Rama për të qenë personi i pushtetshëm në qeverisje. Nëse konfirmohet të jetë ashtu siç është raportuar në media, Edi Rama duhet të dorëhiqet”, u shpreh Salianji.
Salianji tha se nuk kemi të bëjmë më për raste individuale siç kryeministri shprehet pas çdo të akuzuari nga Prokuroria e Posaçme, por për një skemë paligjshmërie dhe korrupsioni që drejtohet nga Edi Rama.
Nisida Tufa: Zv/kryeministrja Balluku është nën hetim. Çfarë do të thotë kjo dhe sa tronditje krijon kjo?
Ervin Salianji: Nëse lajmi për Ballukun konfirmohet zyrtarisht, Edi Rama duhet të dorëhiqet. Belinda Balluku është personi më i rëndësishëm në qeveri, jo vetëm në dukje, por është zv/kryeministre dhe ministrja me portofolin më të madh dhe njeriu me mbështetje politike të fortë, është drejtuesja politike për zgjedhjet e pjesshme të Tiranës. Politikisht është njeriu më i rëndësishëm jo vetëm për shkak të vendimmarrjes, por edhe për shkak të besimit që i ka dhënë Edi Rama për të qenë personi i pushtetshëm në qeverisje. Nëse konfirmohet të jetë ashtu siç është raportuar në media, Edi Rama duhet të dorëhiqet. Do të ishte i dyti rast që zv/kryeministri, numri 2 pas Edi Ramës, numri për shkak të pushtetit në Bashkinë e Tiranës që është Erion Veliaj, një buqetë e madhe ministrash, më shumë se 20 kryetarë bashkish tregon një model korruptiv dhe kriminal të ndërtuar nga Edi Rama. Dhe këtu nuk kemi të bëjmë më me përgjegjësi individuale të këtyre individëve se duket që shtysa kryesore për të prodhuar paligjshmëri në këtë republikë është Edi Rama, se nuk mundet që të jetë i gjithë ekipi dhe ky të jetë më i pastri. Pra, Edi Rama duhet ta mbyllë historinë vetë, ose duhet bërë çdo përpjekje që Edi Rama të largohet një orë e më parë. S’janë raste individuale, por skemë paligjshmërie dhe korrupsioni që drejtohet nga Edi Rama.
Belinda Balluku është Edi Rama, nuk është se ka ndonjë diferencë. E vetmja ministre që është politike, të tjerët duhet të mendohesh shumë për t’i kujtuar se kush janë, s’kanë performancë, as ide politike, as aftësi organizative apo mbështetje qytetare… Ky rast tregon, atë që e keni parë, një ekzaltim për këtë lajm brenda PS – siç po duket pra, apo që Edi Rama është kthyer si ato grirëset e mishit që ky grin jetë njerëzore për të mbajtur pushtetin… Dhe ekzaltimi në PS për këtë rast, po ta shohësh edhe tek disa media që janë ekstremisht mbështetëse të Edi Ramës që kanë një lloj ekzaltimi për këtë rast, tregon që vetë PS mund të jetë në këtë lloj zilie dhe xhelozie.
Nuk ka rëndësi a do të shkojë Balluku apo jo në SPAK, nëse ka ndodhur është një fakt që e dëmton rëndë qeverinë dhe që duhet të bëjë që Rama të dorëhiqet. Fakti qëndron, nëse njeriu më i pushtetshëm që është Edi Rama, edhe në rastin e Ballukut është Rama që merret nën hetim në fakt dhe duhet të japë dorëheqjen e t’i hapë rrugën PS-së për të ndryshuar partinë, reformatuar dhe padiskutim t’i hapë rrugë zgjedhjeve.
Unë flas se si duhet të jetë dhe si duhet të funksionojë një demokraci. Kur ndodhin këto raste, kryeministri mban përgjegjësi dhe jep dorëheqje. Në Shqipëri, fakti që Edi Rama qëndron me forcë pa pyetur për asgjë, tregon atë që e kemi thënë, jemi në autokraci. E dini cilat janë vendet që kanë më shumë arrestime të personave pas liderit, qoftë edhe të niveleve të larta? Vietnami, Kina, Kamboxhia, Butani. Kjo nuk tregon nivelin e demokracisë, por nivelin e lartë të ashpërsisë që ka autokrati dhe të frikës së cilitdo individ që ka afër se në një moment mund ta rrezojë nga pushteti. Edhe ky rast tregon se Edi Rama si autokrat po provon të gjithë elementet për të shmangur përgjegjësinë nga ai. Por në fakt përgjegjësia është e Edi Ramës.
Discussion about this post