Ish-drejtori i Policisë, Shemsi Prençi, ka folur sot gjatë një interviste televizive për zjarrin që ra pak javë më parë në komisariatin e Kamzës, ku humbi jetën një person.
Prençi u shpreh se dhomat e sigurisë në komisariate kanë disa protokolle që duhen respektuar, ndërsa në rastin e tragjedisë, nuk janë respektuar.
Më tej deklaroi se kur një person është i arrestuar, ka precedent të mëparshëm apo ka një vendim gjykate, nuk mund të mbahet në dhomën e izolimit në komisariat, bashkë me një person që mund të jetë i shoqëruar, por pa asnjë rrezikshmëri.
“Kur personi është person me precedent të përsëritur për dhunë, ishte me vendim gjykate, ky person nuk duhet të shkonte, aty por në paraburgim, dhe nëse për 1 mijë arsye nuk mund të transportohej, ai në çdo moment duhet të ishte në vëzhgim të policisë. Fati që përkonte me orar që janë të impenjuar shumë persona për të parë ndeshje, në rregullore thuhet se kur ka evente të ndryshme, personat e ndaluar e shfrytëzojnë këtë moment dhe sipas rregullores në këtë rast duhet rritur vëmendja. Aty i doli tymi, por kudo në Shqipëri shkelen masat”, deklaroi Prençi.
Në të njëjtën linjë është shprehur edhe avokati Adriatik Lapaj, duke thënë se gjithçka ndodhi për shkak të papërgjegjshmërisë.
Lapaj u shpreh se kushtet e dhomave të sigurisë në Komisatriatet e vendit janë në gjendje shumë të rëndë, ku përveçse mbahen persona me rrezikshmëri bashkë me persona që mund te jenë të shoqëruar edhe për mungesë të një letërnjoftimi, tejkalohet kapaciteti i personave në të si dhe kushtet higjienike mungojnë.
Discussion about this post