“As në ëndërrat më të këqija nuk e kam parë që një ditë do ta lëshoja Policinë e Kosovës”
Këto ishin fjalët e një zyrtari policor i cili pas 20 viteve u detyrua të japë dorëheqjen nga policia e Kosovës. Shkak për dorëheqje kanë qenë paga e ulët dhe kushtet ekonomike.
“Në polici kam punuar 20 vjet e 10 muaj. Dorëheqjen asnjëherë nuk e kam menduar prej policisë, edhe atëherë kur kam pas leje qëndrimin e Austrisë në vitin 2010. Ndërkohë jam detyruar të punoj në bujqësi për me e mbajtë familjen 6 anëtarëshe deri sa erdhi momenti që u detyrova me dhënë dorëheqje, në një farë mënyre prej zorit. Se nuk po mundem me e mbajt familjen 6 anëtarëshe dhe askush tjetër përpos pensionit të babës nuk ka të ardhura”
Kryetari i sindikatës së Policisë së Kosovës, Imer Zeqiri, tha se rreth 40 zyrtarë policorë kanë dhënë dorëheqje vullnetare nga Policia e Kosovës dhe shkak, sipas tij, janë pagat e ulëta. Ndonëse sipas Imerit, shkak është bërë edhe siç thotë ai “loja e qeverisë me Policinë e Kosovës në çështjen e ligjit të pagave”
Ndërkohë njohësi i çështjeve të sigurisë, Drizan Shala tha se dorëheqja e këtyre zyrtarëve policorë është neglizhencë e institucioneve përkatëse dhe, sipas tij, për këto dorëheqje më së shumti e pëson Kosova. Ai tha se një polic për t’u bërë i gatshëm për intervenim buxhetit të Kosovës i kushton rreth 20 mijë euro.
Që nga themelimi i policisë së Kosovës, mbi 2 mijë zyrtarë policorë kanë dhënë dorëheqje vullnetare. Shumica e të dorëhequrve e kanë lëshuar Kosovën në, siç thuhet, kërkim të një jete më të mirë.
Discussion about this post