Japonia është gati për të hedhur 1.33 milionë ton mbetje bërthamore nga Fukushima në Paqësor

Shefi i Agjencisë Ndërkombëtare të Energjisë Atomike (IAEA) Rafael Grossi u takua me banorët e Fukushimës sot në një përpjekje për t’i siguruar ata në lidhje me planin e qeverisë japoneze për të hedhur ujë të trajtuar radioaktiv nga centrali bërthamor i dëmtuar në oqean.

Organizmi ndërkombëtar miratoi dje planin e qeverisë japoneze për të hedhur në Oqeanin Paqësor rreth 1.33 milionë tonë ujë të kontaminuar të depozituar në termocentralin bërthamor të Fukushimës, i cili pësoi dëme të rënda pas tërmetit të fuqishëm dhe cunamit të 11 marsit 2011.

Pas një dy vjet rishikimi, u njoftua se plani japonez përmbushte standardet ndërkombëtare të sigurisë dhe do të kishte “ndikim radioaktiv të papërfillshëm mbi njerëzit dhe mjedisin”.

Gjatë vizitës së sotme në Iwaki, rreth 60 kilometra larg centralit bërthamor, kreu i IAEA, Raphael Grossi, ka pranuar se qytetarët janë të shqetësuar për planin japonez, siç komentohet nga rrjeti francez “France 24”.

Sipas CNN, uji nga Fukushima është filtruar për të hequr shumicën e elementeve radioaktive përveç tritiumit, një izotop i hidrogjenit që është i vështirë për t’u ndarë nga uji.

Përpara se të shkarkohet në Oqeanin Paqësor, efluenti i trajtuar do të hollohet në mënyrë që nivelet e tritiumit në të të jenë shumë nën nivelet e miratuara ndërkombëtarisht.

Megjithatë, disa banorë të Fukushimës, kryesisht peshkatarë, janë ata që shqetësohen se konsumatorët nuk do t’i blejnë produktet e tyre.

Tetsu Nozaki, president i Federatës së Sindikatave të Peshkatarëve të Fukushimës, tha se qeveria e Tokios nuk merr parasysh opinionin e qytetarëve që kundërshtojnë planin.

“Ne peshkatarët nuk kemi zgjidhje tjetër veçse të reagojmë emocionalisht dhe të forcojmë qëndrimin tonë,” i tha Nozaki Grossit.

Megjithatë, kreu i IAEA theksoi se roli i organizatës nuk është të “mbulojë tekstet e këqija”.

“Ky nuk është një përjashtim, një plan i çuditshëm i hartuar ekskluzivisht për t’u zbatuar këtu… Kjo është një praktikë më e përgjithshme që pranohet dhe është provuar në shumë rajone, në mbarë botën,” shtoi ai.

Gjithashtu, ai nënvizoi se organizata do të krijojë një zyrë të përhershme në rajon për të mbikëqyrur procesin.

Rafael Grossi pritet të vizitojë sot termocentralin bërthamor të Fukushimës dhe më pas vendet fqinje të Japonisë, duke përfshirë Korenë e Jugut dhe Zelandën e Re.

Nga ana e saj, qeveria e Kinës e ka bërë të qartë se nuk e miraton planin e Tokios.