Java e fundit në La liga/ Atletico humbet në shtesë vendin e 2-të. Benzema e mbyll me gol

Real Madrid dhe Atletico Madrid i kanë mbyllur me barazime ndeshjet e fundit të luajtura kundër Bilbaos dhe Vilareal.

Reali priste në shtëpi Bilbaon ndaj dhe rezultati 1-1 duket zhgënjyes. Në minutën e 10-të, Vesga i Bilbaos dështoi nga penalltia, duke shpërdoruar kështu një mundësi të artë për skuadrën e tij.

Gjithsesi në minutën e 49-të, Sancet realizoi për Bilboan, duke kaluar në avantazh. Por për madrilenët mendoi Benzema, që nga pika e bardhë nuk gaboi dhe në minutën e 72-të u vendos barazpesha.

Kjo ishte ndeshja e fundit e sezonit në La Liga, ku Reali pozicionohet në vend të dytë me 78 pikë, ndërsa Bilbao në të 8-tin me 51 të tilla.

Në ndeshjen tjetër, Atletico Madridi siguroi një pikë nga Vilareali.

Atletico barazoi me rezultatin 2:2 me Villarealin në ndeshjen e fundit të sezonit. Jackson në minutën e 9-të shënoi për vendasit.

Megjithatë Atletico këndellet dhe ka realizuar dy gola përmes futbollistëve Correa (18′ e 56-të) dhe të dy herët ka asistuar Griezmann.

Në minutën e 90+3, Pascual ka barazuar rezultatin 2:2.

Atletico përfundon në vend të tretë me 77 pikë, duke mos përfituar nga barazimi i Real për tu renditur i 2-ti në La Liga. Villareali e mbyll sezonin në të pestin me 64 pikë.

Osasuna siguron pjesëmarrjen në Conference League në javën e fundit të La Ligas. Skuadra navarre fitoi 2-1 përballë Gironës, duke mbajtur përfundimisht pas në renditje Bilbaon.

Budimir me dygolëshin e tij rezultoi heroi i Osasunës, duke e bërë të pavlefshëm finalizimin e Reinier në pjesën e dytë.

Në sfidat e tjera, Sevija u mposht 2-1 nga Sosiedadi, teksa Majorka e Vedat Muriqit mposhti 3-0 Rajo Vajokanon e Ivan Balliut.