Ditën e hënë pritet që qeveria të marrë një vendim në lidhje me ata që konsumojnë mbi 800 kw/h energji elektrike. Ndërkohë, sot kryeministri Edi Rama këmbënguli se ekzekutivi që ai përfaqëson do të paguajë 80% të faturës për familjet dhe biznesin e vogël.
Sipas tij, vetëm 20% e faturës së energjisë paguhet nga konsumatorët, teksa nuk tha asnjë fjalë për ndryshimet në llogaritjen e energjisë që ka nisur nga fillimi i këtij muaji.
“Deri sot megjithëse është bërë gjithmonë e më e vështirë ne kemi mbrojtur familjet dhe biznesin e vogël. në faturën e energjisë elektrike që ju vjen nëpër shtëpi, ju keni edhe një fashë të kuqe që u shpjegon për çmimin, por duhet ta dini që keni një çmim që është 20% të çmimit real.
80% e paguan buxheti i shtetit me vendim të prerë të qeverisë për të mos e transferuar krizë te familjet. E njëjta gjë vlen edhe për biznesin e vogël. Nëse ne do mbronim çmimin e familjeve por jo të biznesit të vogël, rritja e çmimit të energjisë për to, do të përkthehej në transferim të kostos te produktet që ju blini”, tha Rama.
Sipas tij “Jemi në luftë dhe nëse thonë se i shërbej dikujt tjetër, nuk di çfarë të them. Jemi në luftë, pasi qëllimi kryesor që e ka nxitur Putin të nise ofensivën ndaj Ukrainës, nuk është për të marrë ca copa toke por për të gjunjëzuar Perëndimin. Ky është qëllimi i luftës dhe për ta bërë këtë bombat bien në Ukrainë, vrasjet, palët por ndërkohë ne jemi duke vuajtur pasoja. Energjia është e kthyer në armë dhe tjetra është inflacioni i luftës.
Këto janë armët që po përdor Putin. Rusia ka futur në një situatë të vështirë gjithë shtetet, ne nuk i shmangim dot pasi duhet të dalim në treg për të importuar. Ne nuk mund të prodhojmë dot gjithë nevojat tona energjetike.”
Discussion about this post