Adriatik Lapaj, sikurse ditët e mëparshme ndodhet në mesin e qytetarëve duke protestuar kundër rritjes së çmimeve. Lapaj është shprehur se ata do të qëndrojnë në shesh për 24 orë, duke marrë edhe batanije.
“Është dita e tetë, marshimi i dytë kombëtar. Siç e patë ka shumë njerëz në shesh. Qytetarët për herë të parë në tranzicion e ka detyruar qeverinë që t’i fusë në axhendën e tyre. Po ndodh, është ndalur rritja e çmimit të naftës, është hedhur një paketë e rezistencës sociale me vlerë 390 miliardë lekë, që në gjykimin tonë është ende e pamjaftueshme. Janë 16 ushqime që do të kenë tashmë çmime stabël. Por nuk janë mjaftueshëm, sepse në Maqedoninë e veriut po të llogarisësh edhe taksën e qarkullimit, nafta është të paktën 200 lekë të vjetra më lirë se këtu. Në Kroaci po ashtu ka më shumë masa, po reduktohet TVSH-ja”, shprehet ai.
Lapaj tha se nuk ka pasur një plan konkret pasi vendimi është marrë në moment në shesh, por gjithçka do të jetë simbolike për të treguar qëndresën e tyre.
“Kjo nuk është protesta e Adriatikut, Osmanit, por e hallit, e xhepave tanë. Për mua dhe sikur vetëm të jem siç e nisëm në fillim, për sa kohë është e drejtë, është e bërë. Ka pas diskutime, jo mos u shisni, jo mos u blini, sheshi ka vendosur, do qëndrojmë 24 orë, nuk jemi oligarkë”, shprehet juristi.
Ai shtoi se nëse qeveria do t’i plotësonte kërkesat e qytetarëve, ai do ta duartrokiste i pare.
Discussion about this post