E teksa beteja e ashpër mes Rusisë dhe Ukrainës po vazhdon, prej më shumë se një muaj, ku humbjet nga të dyja fronet e luftës janë të shumta, pretendime të frikshme kanë pushtuar rrjetet sociale.
Sipas deklaratave të bëra nga ushtarët e batalionit “Azov” të cilët kanë qenë të angazhuar në frontin e luftës në qytetin e Mariupolit, rusët kanë hedhur një substancë të paidentifikuar.
“Armë kimike janë përdorur kundër ushtarakëve dhe civilëve ukrainas në Mariupol kohët e fundit. Droni rus hodhi një substancë të panjohur që shkaktoi mbytje dhe sindromë vestibulo-ataktike”, thuhet në deklaratën e Batalionit Azov.
Ky pretendim nuk është provuar ende, por nëse do të verifikohej, do të përbënte një shkelje të rëndë të Protokollit të Gjenevës dhe një krim tjetër lufte, të ushtrisë ruse ndaj ukrainasve.
Eduard Basurin, një zëdhënës i përfaqësuesve të Rusisë në Donetsk, është shprehur se nuk kishte kuptim të sulmohej uzina e mirëfortifikuar e kontrolluar nga ukrainasi Azovstal në Mariupol, sepse trupat ruse do të pësonin viktima të rënda.
Kujtojmë që për përdorimin e armëve kimike nga Rusia ka folur dhe sekretari i Përgjithshëm i NATO-s, Jens Stoltenberg i cili ka deklaruar se përdorimi i armëve të tilla do të “ndryshonte rrënjësisht natyrën e konfliktit”.
Stoltenberg nuk pranoi të “spekulojë” për përgjigjen konkrete të NATO-s në rast të përhapjes së një sulmi kimik në vendet e NATO-s, por garantoi se “NATO është gjithmonë e gatshme të mbrohet dhe të reagojë ndaj çdo lloj sulmi”.
Po ashtu dhe presidenti i Shteteve të Bashkuara të Amerikës (SHBA) Joe Biden tha se nëse Rusia përdor armë kimike në Ukrainë, ata do të përgjigjen dhe se përgjigja do të varet nga përdorimi i armëve kimike.
Joe Biden iu drejtua gazetarëve gjatë një konference për shtyp pas Samitit të NATO-s të mbajtur në Bruksel të Belgjikës. I pyetur nëse kishte ndonjë informatë se Rusia do të përdorë armë kimike në Ukrainë, Biden tha: “Unë nuk mund t’ju jap të dhëna të inteligjencës tani, kështu që nuk mund t’i përgjigjem pyetjes suaj. Por, nëse Rusia i përdor ato (armë kimike), ne do të përgjigjemi. Përmbajtja e kësaj përgjigje varet nga mënyra se si përdoret arma”, deklaroi Biden.
Discussion about this post