Demokrati Enkelejd Alibeaj ka reaguar në lidhje me deklaratat e qeverisë për ngjarjen në Himarë, të cilët po përpiqen të zbusin situatën dhe t’u mbyllin sytë qytetarëve. Alibeaj, përmes një shkrimi në Facebook shprehet se kjo ngjarje do të mbetet një plagë e hapur, ndërsa qëndrimi i qeverisë tregon se sistemi është i kapur nga policë të inkriminuar. Sipas tij, Rama dhe të tjerë nuk mund t’i largohen kësaj përgjegjësie, për aq kohë sa ishin ata që e ndërtuan këtë sistem, ku jeta jonë nuk është më e siguritë.
“Tragjedia e familjes që humbi dje vajzën e mitur është ende një plagë e hapur për të gjithë shqiptarët, që përtej dhimbjes së papërshkruar për ngjarjen që i ka lënë të shokuar, u duhet të përballen dhe me cinizmin dhe arrogancën e kryeministrit.
Në një vend ku jeta nuk ka më asnjë vlerë, kur sigurinë e cenojnë ata që kanë për detyrë ta ruajnë, çdo shkarkim nga detyra në hallkat lokale të përgjegjësisë shtetërore nuk është zgjidhje e problemit. Përgjegjësia kryesore mbetet e atyre që kanë krijuar dhe mbajnë në këmbë sistemin ku të inkriminuarit dhe të korruptuarit e niveleve të ulëta reflektojnë asgjë më shumë se sjelljen e shefave të tyre: arrogancë, papërgjegjshmëri dhe pandjeshmëri ndaj njerëzve të thjeshtë dhe pa pushtet.
Në krizën e përgjithshme që ka përfshirë Shqipërinë, ngjarja e djeshme është dëshmi e qartë se kësaj qeverie nuk i intereson jeta e qytetarëve. Përballë mungesës së vullnetit, paaftësisë dhe arrogancës së pushtetit qëndrojnë qytetarët”, shkruan Alibeaj. Ndërsa shtoi se nga sot edhe më shumë shqiptarë do të mendojnë largimin nga vendi, së paku për të mbrojtur jetën e fëmijëve të tyre.
Discussion about this post