Trafikantët shqiptarë të drogës kanë filluar të sofistikojnë lëvizjet e tyre në trafikimin e mallit, pasi nëse jemi mësuar që në portin e Durrësit të kapen sasi të konsiderueshme kokaine brenda ngarkesave me banane, së fundmi strategjia ka ndryshuar.
Sot mësohet se është kapur një sasi e madhe kokaine, por kësaj radhe e fshehur në një ngarkesë qymyri. Droga është gjendur në hambarin e anijes Unistream me flamur të Antigua Barbuda. Anija u ankorua me dt 16 maj në kalatën lindore të portit detar të Durrësit.
Ajo ka transportuar qymyr me destinacion portin e Durrësit, ndërsa brenda saj janë gjetur të fshehura edhe pakot e kokainës. Në të gdhirë në bordin e anijes është gjendur njësia task force e cila ka qenë e sinjalizuar nga partnerët ndërkombëtarë për ekzistencën e drogës në hambarët e anijes.
Nga kontrolli ka rezultuar se një sasi droge e ambalazhuar gjendej në hambarët e anijes. Puna po vazhdon dhe ende droga nuk është peshuar.
Discussion about this post